DÍLI, STLTIMORLESTE.com — Primeiru-Ministru (PM), Kay Rala Xanana Gusmão afirma katak, profesór sira mak ajente transformasaun no erói nasaun nian, ne’ebé prepara jerasaun foun ba futuru.
Xanana hato’o deklarasaun ne’e iha komemorasaun Loron Mundial Profesór nian, ne’ebé hala’o iha INFORDEPE, Balide, Dili, tersa-feira, 27 Outubru 2026.
Nia afirma katak, profesór sira iha responsabilidade importante atu eduka estudante sira, forma lideransa futuru no kontribui ba dezenvolvimentu nasaun.
“Ohin Loron Mundial ba Profesór mak loron importante no espesiál ba futuru Timor-Leste nian,” deklara Primeiru-Ministru.
Xanana subliña katak, edukasaun tenke sai prioridade estratéjika ba Governu, tanba nia sai baze ba dezenvolvimentu no konstrusaun nasaun.
“Edukasaun, iha nasaun ida-idak, tenke sai prioridade estratéjika ba Governu,” afirma Xanana.
Nia mós konsidera profisaun dosente nu’udar misaun importante atu prepara labarik sira sai sidadaun matenek no kontribui ba progresu Timor-Leste.
Iha eventu ne’e, Ministra Edukasaun, Dulce de Jesus Soares, simu partisipante sira no hato’o mensajen kona-ba importánsia profisaun profesores.
Nia hatete katak, Timor-Leste selebra komemorasaun ne’e durante tinan sanulu resin ona. Tinan 2026 marka tinan-60 hosi adosaun UNESCO nian ba Rekomendasaun kona-ba Estatutu Profesór, ne’ebé aprova iha 1966.
Tema tinan ne’e nian mak “Hamriik ho profesór sira: Tinan 60 hodi proteje profisaun, promove estatutu no forma ita-nia futuru”.
Tema ne’e enfatiza nesesidade atu proteje direitu profesór sira-nian, hadi’a kondisaun servisu, responde ba falta profesór no enfrenta dezafiu dijitál no mudansa klimátika.
Ministra mós apela atu organiza eventu sira iha loron la-letivu, hodi evita interrompe prosesu aprendizajen no garante estudante sira-nia direitu ba edukasaun.
“Estudante sira-nia direitu ba edukasaun tenke tau aas liu buat hotu,” afirma Dulce de Jesus Soares.
Nia enfatiza katak, profesór sira tenke marka prezensa iha sala-aula, tuir oras servisu no dedika tempu tomak ba hanorin no dezenvolvimentu estudante sira.
Ministra dehan katak, profesór sira-nia preparasaun, dedikasaun no komunikasaun ho inan-aman importante atu hasa’e rezultadu aprendizajen.
Nia mós defende restaurasaun dignidade profisaun dosente nian, hodi garante profesór sira iha Timor-Leste tomak bele hala’o knaar ho konfiansa no orgullu.
“Se laiha profesór, laiha profisaun seluk mak eziste,” afirma Ministra, hodi subliña kontribuisaun profesór sira ba formasaun profisionál hotu.
Iha remata, Ministra apela ba profesór sira atu prepara lisaun ho di’ak, fó apoiu ba estudante ne’ebé presiza no promove kolaborasaun ho família no komunidade.
“Profesór doben sira, Ita-Boot sira mak erói nasaun nian,” hakotu.
(eme)
