DILI, STLTIMORLESTE.com — Traballadór Timoroan hamutuk 35.964 servisu iha Austrália, Koreia do Sul no Nova Zelándia, tuir dadus Sekretariadu Estadu Formasaun Profisionál no Empregu (SEFOPE).
Sekretáriu Estadu SEFOPE, Rogério Mendonça hato’o informasaun ne’e ba jornalista sira iha Palásiu Prezidensiál Nicolau Lobato, Bairo Pite, Kuarta-feira (28/10/2026).
Rogério esplika katak, tuir dadus SEFOPE, traballadór timoroan 27.403 servisu iha Austrália, 8.466 iha Koreia do Sul no 95 iha Nova Zelándia.
“Agora ita iha traballadór 27.403 iha Austrália, 8.466 iha Koreia do Sul no 95 iha Nova Zelándia,” dehan Rogério Mendonça.
Nia informa katak, traballadór foun na’in 140 hetan ona rekrutamentu atu servisu iha Nova Zelándia, no na’in 200 resin hein atu bá durante novembru.
Rogério mós revela katak, Prezidente Repúblika, José Ramos-Horta rekomenda SEFOPE atu identifika setór empregu foun iha Koreia do Sul, hodi aumenta oportunidade ba timoroan.
Nia esplika katak, setór empregu ne’ebé agora simu traballadór timoroan mak peska, fabrikasaun no agrikultura, maibé SEFOPE hakarak esplora mós área ospitalidade no kuidadu katuas-ferik.
Rogério afirma katak, SEFOPE sei diskute rekomendasaun ne’e ho ministériu no entidade kompetente sira, atu avalia possibilidade habelar oportunidade empregu ba traballadór timoroan.
Nia mós temi katak, traballadór balu sai husi sistema empregu durante pandemia COVID-19, situasaun ne’ebé afeta timoroan no traballadór husi nasaun seluk.
Entretantu, Prezidente Ramos-Horta husu traballadór timoroan sira atu aproveita oportunidade empregu iha rai-li’ur ho responsabilidade, respeita regra no prosedimentu, hodi hetan rendimentu atu sustenta família.
(eme)
