DÍLI, STLTIMORLESTE.com – Xefi Suku Bebonuk kontinua buka apoiu husi autoridade munisipál no komunidade atu responde ba nesesidade ema kbiit-laek no ema ho defisiénsia (EhD).
Preokupasaun ne’e hato’o husi Xefi Suku Bebonuk, Alfredo da Costa, ba STL iha Bebonuk, Kuarta (28/10/2026).
Nia hateten katak, Suku Bebonuk iha aldeia lima ne’ebé kontinua hasoru dezafiu atu atende nesesidade komunidade, liuliu ema kbiit-laek no ema ho defisiénsia.
“Ha’u nu’udar autoridade lokál la bele nonok de’it bainhira komunidade hasoru difikuldade. Ami kontinua buka dalan atu hato’o no responde ba sira-nia preokupasaun, liuliu ema kbiit-laek no ema ho defisiénsia,” nia dehan.
Nia esplika katak, tuir dadus ne’ebé iha, Suku Bebonuk rejista ema kbiit-laek hamutuk na’in 35 no ema ho defisiénsia na’in 50 resin.
Nia dehan, nu’udar lideransa lokál, nia kontinua halo koordenasaun ho autoridade iha postu administrativu no munisípiu atu buka solusaun ba nesesidade komunidade.
Nia esplika katak, nesesidade prinsipál ne’ebé komunidade enfrenta mak apoiu ai-han. Durante ne’e, autoridade munisipál mós fó apoiu ho ai-han atu ajuda komunidade sira ne’ebé presiza.
Maibé, apoiu ne’e la’ós atuál kada loron, tanba dala ruma simu apoiu kada fulan rua ka tolu. Tanba ne’e, komunidade kontinua hato’o sira-nia preokupasaun ba lideransa suku, ne’ebé liuhusi karta informa ba autoridade munisipál atu buka resposta.
Nia afirma katak, númeru ema ne’ebé presiza apoiu bele kontinua aumenta. Tanba ne’e, presiza iha atensaun no kolaborasaun husi parte hotu atu ajuda ema vulnerável sira.
N’udar lideransa komunitária, nia la hakarak husik ema kbiit-laek no ema ho defisiénsia enfrenta sira-nia problema mesak, maibé hakarak promove kultura ajuda malu.
Nia mós hato’o katak, komunidade fó fiar ba lideransa suku atu reprezenta sira-nia interese. Tanba ne’e, nia orienta xefi aldeia sira atu rekolla dadus kona-ba ema kbiit-laek no ema ho defisiénsia, hodi fasilita prosesu buka apoiu.
Apoiu ne’ebé komunidade simu inklui sasán nesesáriu hanesan foos, mina no sasán báziku seluk.
Nia aumenta katak, rede sosiál mós sai hanesan meiu ida atu mobiliza apoiu, tanba Timoroan barak ne’ebé hela iha rai-li’ur partisipa hodi ajuda sira-nia maluk ne’ebé presiza tulun.
Atu asegura katak komunidade bele hato’o sira-nia nesesidade, lideransa suku organiza enkontru ho komunidade dala rua kada tinan, hodi rona no identifika preokupasaun sira, liuliu husi ema kbiit-laek no ema ho defisiénsia.
Suku Bebonuk iha aldeia lima, mak Aldeia 20 de Setembru, Meti I, Meti II, Meti III no Meti IV.
(joa)
