DILI, STLTIMORLESTE.com – Autoridade Munisipál Dili (AMD) prevê katak kapasidade Semitériu Bekusi sei remata iha Novembru 2026, no prepara abertura Semitériu Metinaro.
Prezidente Autoridade Munisipál Dili, Francisco dos Santos, hateten katak avaliasaun téknika hatudu Semitériu Bekusi tama ona ba faze kritiku tanba limitasaun espasu.
Situasaun nee bele difikulta fatin ba hakoi matebian foun, nunee AMD kontinua prepara funsionamentu Semitériu Metinaro,hatete nia ba jornalista sira iha konferénsia imprensa, iha edifísiu PAM Díli, Kuarta (28/10/2026).
Abertura Semitériu Metinaro importante atu aumenta kapasidade ba hakoi matebian no responde ba nesesidade komunidade nian.
Hanesan medida temporária, AMD bele autoriza família sira atu loke fila-fali rate ka kampa família nian atu hakoi matebian foun, tuir pedidu no regra neebé vigora.
Medida nee aplika ba semitériu Bekusi, Bidau Santa Ana no Cacaulidun, ho kumprimentu ba norma sanitária no dispozisaun legál.
AMD mós husu família sira neebé hakarak tau hamutuk restu mortál iha rate ka kampa ida, ka muda restu mortál ba semitériu seluk, atu husu autorizasaun uluk.
Depois hetan autorizasaun, família bele halao ezumasaun, trasladasaun no re-inumasaun, tuir prosedimentu legál no sanitáriu neebé vigora.
AMD informa katak família sira mak responsabiliza ba preparasaun, lojístika, transporte no despeza operasionál relasiona ho prosedimentu hirak nee.
Informasaun kona-ba dokumentasaun nesesária no etapa administrativu disponivel iha anúnsiu públiku neebé AMD prepara ona.
AMD agradese ba komunidade nia komprensaun no kolaborasaun, no reafirma kompromisu atu presta servisu públiku ho responsabilidade, respeitu no dignidade.
(alb)
