DILI, STLTIMORLESTE.com — Prezidente Repúblika (PR), José Ramos-Horta simu delegasaun Uniaun Europeia (UE) ne’ebé prepara misaun observasaun ba eleisaun prezidensiál iha Marsu 2027.
Enkontru ne’e hala’o iha Palásiu Prezidensiál Nicolau Lobato, Bairru Pité, Dili, Kuarta-feira (28/10/2026), atu diskute preparasaun eleisaun, estabilidade polítika no seguransa nasaun.
Embaixadór UE ba Timor-Leste, Thorsten Bargfrede, dehan katak delegasaun ne’e mai atu avalia ambiente polítiku no preparasaun ba eleisaun prezidensiál 2027.
“Objetivu ami-nian mak atu observa ambiente jerál eleisaun prezidensiál iha Timor-Leste,” dehan Thorsten Bargfrede.
Nia informa katak, misaun observasaun UE sei hahú iha Janeiru 2027, ho observadór na’in 50 ne’ebé sei hala’o atividade iha munisípiu hotu durante fulan rua ka liu.
Delegasaun ne’e sei koloka observadór na’in rua iha munisípiu ida-idak, atu akompaña preparasaun no prosesu eleisaun prezidensiál.
Tuir embaixadór, observadór sira sei hasoru partidu polítiku, sosiedade sivíl, instituisaun judisiária no reprezentante mídia, atu komprende kondisaun demokrátika no prosesu eleisaun iha Timor-Leste.
Durante misaun, ekipa UE sei halo enkontru ho komisaun eleisaun, polísia no reprezentante partidu polítiku, atu avalia prosesu antes, durante no depois votasaun.
Thorsten Bargfrede esplika katak, UE observa ona eleisaun iha Timor-Leste dala lima ka neen, hahú hosi restaurasaun independénsia iha 2002.
Nia hatete katak, relatóriu kona-ba rezultadu observasaun sei aprezenta iha Bruxelas, hafoin misaun remata.
Embaixadór ne’e mós subliña katak enkontru ho Prezidente Ramos-Horta fó oportunidade atu diskute estabilidade polítika no seguransa nasaun nian.
Nia reafirma katak, UE sei kontinua apoia Timor-Leste, la’ós de’it iha prosesu eleisaun, maibé mós iha dezenvolvimentu, setór privadu no área seluk.
Iha parte seluk, Prezidente Repúblika José Ramos-Horta simu ho di’ak delegasaun UE no konsidera organizasaun ne’e nu’udar parseiru importante ba dezenvolvimentu demokrátiku Timor-Leste nian.
(eme)
