DILI, STLTIMORLESTE.com – Ministériu Edukasaun (ME) liuhusi Sekretariadu Ensinu Sekundáriu Jerál no Ensinu Sekundáriu Tékniku-Vokasionál, realiza semináriu internasionál kona-ba Inteligénsia Artifisiál (IA), transisaun dijitál no formasaun tékniku-vokasionál, iha salaun Ian Martin, Balide, Kuarta-feira (28/10/2026).
Sekretáriu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hatete ba jornalista katak semináriu ne’e importante atu hasa’e koñesimentu no kapasidade profesór sira nian kona-ba dezenvolvimentu teknolojia dijitál, liuliu Inteligénsia Artifisiál.
“Ohin ita realiza semináriu internasionál ida kona-ba Inteligénsia Artifisiál no teknolojia dijitál. Iha fulan hirak liubá, ami ba vizita nasaun Coreia no halo diskusaun kle’an ho eskola tékniku-vokasionál sira. Tanba ne’e, ita fó apoiu ba formasaun kona-ba IA no teknolojia dijitál ne’e. Ita-nia alvu mak partisipante na’in 250, inklui profesór sira, atu tuir formasaun ida-ne’e,” nia dehan.
Nia esplika katak, iha tempu ne’ebá, Ministériu Edukasaun kontinua instala ekipamentu Teknolojia Informasaun no Komunikasaun (ICT) iha eskola sira. Tanba ne’e, profesór sira presiza akompaña no adapta an ba dezenvolvimentu teknolojia, inklui uza ekipamentu multimédia iha prosesu hanorin no aprende.
Domingos Lopes Lemos mós husu profesór sira, liuliu sira ne’ebé hanorin área multimédia, atu aproveita oportunidade formasaun ne’e hodi hasa’e kapasidade profisionál no uza teknolojia ho efetivu iha sala aula.
(jac)
