DÍLI, STLTIMORLESTE.com – Maski Lei-Baze Edukasaun prevee katak profesór sira iha ensinu sekundáriu tenke iha kualifikasaun lisensiatura (S1), maibé tanba rekursu umanu ne’ebé limitadu, profesór ho kualifikasaun bacharelatu ka diploma D3 sei kontinua hanorin iha nivel ne’e.
Diretór Nasionál Ensinu Sekundáriu iha Ministériu Edukasaun (ME), Benjamin Gomes da Cruz Fernandes hato’o informasaun ne’e ba STL iha salaun Ian Martin, Balide, Kuarta-feira (28/10/2026).
Nia hatete katak, ME servisu hamutuk ho instituisaun ensinu superiór atu prepara profesór sira tuir nesesidade setór edukasaun nian. Ida-ne’e tanba Lei-Baze Edukasaun hatete katak profesór ensinu sekundáriu tenke iha kualifikasaun lisensiatura, la’ós de’it bacharelatu ka D3.
“Ami servisu hamutuk ho ensinu superiór atu prepara manorin tuir nesesidade ne’ebé ami presiza. Tanba Lei-Baze Edukasaun ko’alia katak, atu hanorin iha ensinu sekundáriu, labele D3 ka bacharelatu, maibé tenke ema ho kualifikasaun S1 ka lisensiatura,” nia dehan.
Benjamin Gomes da Cruz Fernandes esplika katak, atu garante profesór hotu iha kualifikasaun lisensiatura, presiza tempu no depende ba situasaun no kondisaun rekursu umanu iha Timor-Leste.
Nia rekoñese katak, maski hakarak implementa lei tomak, realidade iha terrenu seidauk permite atu realiza objetivu ne’e kedas, tanba falta profesór ho kualifikasaun ne’ebé presiza.
“Ita iha de’it bacharelatu sira, entaun ita tenke husik sira hanorin uluk. Ita lao tuir lei ne’ebé iha, maibé atu muda buat hotu ne’e presiza tempu, tanba rekursu umanu ne’e presiza tempu atu ita bele hetan,” nia afirma.
Nia husu parte hotu atu komprende situasaun ne’ebé setór edukasaun enfrenta, enkuantu governu kontinua buka dalan atu prepara profesór sira ho kualifikasaun tuir padraun ne’ebé Lei-Baze Edukasaun determina.
(jac)
