DÍLI, STLTIMORLESTE.com – Eskola sekundáriu hitu iha Munisípiu Viqueque seidauk hetan konsesaun eskolar ba fulan lima tuirmai, tanba seidauk hatama relatóriu kona-ba ezekusaun fundu ba períodu dahuluk no daruak.
Diretór Nasionál Ensinu Sekundáriu iha Ministériu Edukasaun (ME), Benjamin Gomes da Cruz Fernandes, hatete ba STL iha Salaun Ian Martin, Balide, kuarta-feira (28/10/2026), katak eskola sekundáriu sira iha munisípiu seluk hatama ona relatóriu, maibé eskola hitu iha Viqueque seidauk kumpre obrigasaun ne’e.
“KE ba fulan lima tuirmai ne’e, Viqueque seidauk hetan tanba seidauk hatama relatóriu. Bainhira relatóriu ne’e hatama ona, mak bele hetan osan. Munisípiu sira seluk simu ona osan iha konta bankária eskola ida-idak nian atu hala’o ezekusaun,” dehan Benjamin.
Nia esplika katak, tuir informasaun ne’ebé ME simu husi Munisípiu Viqueque, eskola sira sei prepara hela relatóriu, nune’e prosesu transfere fundu ba eskola hirak-ne’e seidauk bele kontinua.
Benjamin afirma katak, iha totál eskola sekundáriu públiku no privadu hamutuk 75, maibé eskola hitu iha Viqueque mak seidauk hatama relatóriu. Nia mós hatete katak sistema sei taka iha loron 15 Novembru, nune’e eskola sira presiza hatama relatóriu antes prazu ne’e.
“Prosesu hotu hein atu halo transferénsia de’it ona, maibé presiza hein relatóriu ne’e atu hatama uluk, hodi bele atribui osan ba sira,” nia akresenta.
(jac)
