DILI, STLTIMORLESTE.com — Uniaun Europeia (UE) diskute ho Primeiru-Ministru Kay Rala Xanana Gusmão kona-ba sistema eleisaun iha Timor-Leste no avalia preparasaun ba misaun observasaun Eleisaun Prezidensiál ne’ebé planeia atu realiza iha Marsu 2027.
Diskusaun ne’e hala’o iha Palásiu Governu, Dili, kuarta-feira (28/10), entre Embaixadór UE iha Timor-Leste, Thorsten Bargfrede, ho PM Xanana, ne’ebé akompaña hosi Ministru Administrasaun Estatál, Tomás do Rosário Cabral, no delegasaun UE.
Hafoin enkontru, Bargfrede esplika ba jornalista sira katak vizita ne’e iha objetivu atu diskute kona-ba sistema eleisaun no preparasaun ba eleisaun prezidensiál tuirmai.
UE simu konvite atu observa eleisaun prezidensiál iha Timor-Leste iha 2027. Atu prepara misaun ne’e, delegasaun UE lori peritu sira iha área polítika, legál no lojístika atu avalia kondisaun no preparasaun nesesária molok deside kona-ba haruka misaun observasaun eleitorál.
“Mai iha ne’e ho peritu sira kona-ba kestaun polítika, legál no lojístika hodi avalia karik kondisaun sira iha ona atu Uniaun Europeia bele mai fali hanesan observadór eleitorál,” Bargfrede dehan.
Molok hasoru PM Xanana, delegasaun UE hasoru ona ho reprezentante sira hosi sosiedade sivíl, partidu polítiku no média nasionál atu rona sira-nia perspetiva kona-ba prosesu eleisaun iha Timor-Leste.
Misaun Observasaun Eleitorál UE konsidera nu’udar instrumentu importante atu hametin instituisaun demokrátika, promove transparénsia no aumenta konfiansa públika ba prosesu no rezultadu eleisaun.
Desizaun kona-ba misaun observasaun ba eleisaun prezidensiál 2027 sei depende ba avaliasaun kona-ba kondisaun polítika, legál no lojístika iha Timor-Leste.
(jos)
