DÍLI, STLTIMORLESTE.com — Ekipa voleibol mane Aby Travel manán Joli-Tomi ho rezultadu 3–0, iha kompetisaun Liga Voleibol Timor-Leste 1.ª Divizaun, Époka 7.º 2026, iha Ginásiu Desportu Díli, Kuarta-feira (28/10/2026).
Iha jogu ne’e, ekipa rua hatudu kapasidade téknika ne’ebé di’ak liuhosi smash, passing, servis no bloku. Jogadór lokál no estranjeiru husi ekipa rua kontribui atu aumenta kualidade kompetisaun.
Iha set dahuluk, Joli-Tomi no Aby Travel hala’o disputa ne’ebé maka’as, ho pontu sira nafatin besik malu. Maibé, Aby Travel konsege manán set ne’e ho rezultadu 25–20.
Iha set daruak, Joli-Tomi buka atu halo rekuperasaun, maibé Aby Travel kontinua hatudu konsentrasaun no konsege manán ho rezultadu 25–23.
Iha set datoluk, kompetisaun kontinua intensa, tanba ekipa rua troka pontu malu. Maski Joli-Tomi halo esforsu atu nafatin iha kompetisaun, Aby Travel konsege taka set ne’e ho rezultadu 25–23.
Ho rezultadu final 3–0, Aby Travel sai manan nain iha jogu ne’e, depois manán set tolu konsekutivu. Árbitru primeiru Acácio Amaral no árbitru segundu Egídio Neves mak dirije jogu ne’e.
Vitória ne’e hatudu kapasidade Aby Travel atu mantein konsentrasaun no ezekuta téknika sira ho di’ak iha momentu importante, enkuantu Joli-Tomi sei presiza halo avaliasaun ba nia dezempeñu atu hadi’a rezultadu iha jogu sira tuirmai.
(leo)






