DÍLI, STLTIMORLESTE.com – Ainaro manan Liquiça ho rezultadu 3–1, maibé ekipa rua ne’e la konsege avansa ba oitavu finál iha kompetisaun Festival Nasionál Desportu (FND) 2026.
Iha Domingu (22/11/2026), ekipa voleibol mane Munisípiu Ainaro hasoru Liquiça iha faze preliminár, iha Gináziu Desportu Díli.
Iha set dahuluk, Liquiça hahú ho di’ak no konsege manan Ainaro ho rezultadu 25–21, hodi lidera temporariamente 1–0.
Maibé, iha set daruak, Ainaro muda estratéjia no domina jogu, manan ho rezultadu 25–15, hodi igua rezultadu 1–1.
Iha set datoluk, Ainaro kontinua nia dominíu iha kampu no manan ho rezultadu 25–13, hodi lidera jogu ho rezultadu 2–1.
Iha set dahaat, Ainaro kontinua hatudu konsisténsia no manan ho rezultadu 25–11, hodi garante vitória jerál 3–1 kontra Liquiça.
Maski Ainaro manan partida ne’e, ekipa rua ne’e la konsege hetan oportunidade atu avansa ba faze oitavu finál, tuir informasaun disponivel.
(leo)






