DILI, STLTIMORLESTE.com – Eskola hamutuk hitu (7) iha Munisípiu Ainaro agora dadaun tama ona iha faze konstrusaun edifísiu foun, ho objetivu atu aumenta sala aula no hadi’a fasilidade ba estudante sira durante prosesu ensinu no aprendizajen.
Diretór Servisu Edukasaun Munisípiu Ainaro, Patrício da Costa Magno, hateten informasaun ne’e ba STL liuhusi telefone, Domingu (22/11/2026).
“Ita-nia eskola hitu mak agora dadaun halo hela konstrusaun foun. Eskola hitu ne’e hotu halo konstrusaun foun, la’ós reabilitasaun. Iha pre-eskolár ida no ensinu báziku, no la kleur tan kompania ida sei mai halo konstrusaun ba ensinu sekundáriu ida, maibé konstrusaun ne’e seidauk hahú,” nia dehan.
Nia esplika katak, orsamentu ba konstrusaun eskola hirak ne’e mai husi instituisaun oioin, inklui Agência de Desenvolvimento Nacional (ADN), Ministériu Obras Públikas no Ministériu Edukasaun (ME). Maski nune’e, nia la konsege lembra ho loloos montante orsamentu ba konstrusaun hirak ne’e.
Nia aumenta katak, konstrusaun balun foin hala’o faze fundamentu, enkuantu konstrusaun seluk atinji ona progresu 90%.
“Ita halo konstrusaun edifísiu eskola ne’e atu bele aumenta sala aula ba estudante sira, hodi fasilita prosesu ensinu no aprendizajen. Tanba ne’e, eskola balun hahú ona hadi’a no iha futuru ita presiza kontinua hadi’a tan,” nia afirma.
Iha parte seluk, Diretór Servisu Edukasaun Munisípiu Bobonaro, Miguel Freitas, hateten katak governu sei loke pre-eskolár hamutuk 23 iha suku sira ne’ebé seidauk iha servisu edukasaun pre-eskolár, no sei halo konstrusaun edifísiu ba eskola hirak ne’e.
(jac)






