DÍLI, STLTIMORLESTE.com – Ekipa voleibol feto Munisípiu Viqueque hetan vitória ho rezultadu set 3–0 kontra Munisípiu Manatuto, iha kompetisaun Festival Nasionál Desportu (FND) 2026, faze preliminár, ne’ebé hala’o iha Domingu (22/11), iha Gináziu Desportu Díli.
Iha set dahuluk, ekipa rua hatudu kompetisaun maka’as, ho troka pontu ba malu durante jogu. Viqueque konsege manán ho rezultadu 33–31, depois luta pontu to’o igualdade 31–31.
Iha set daruak, Viqueque kontinua hatudu dominíu no konsege manán ho rezultadu 25–8, depois hahú husi inísiu set ho vantajen pontu.
Iha set datoluk, Viqueque kontinua nia konsentrasaun no manán tan ho rezultadu 25–20, hodi taka partida ho vitória set 3–0.
Ho rezultadu ne’e, Munisípiu Manatuto la konsege kontinua ba faze tuirmai, enkuantu Viqueque avansa ba kompetisaun tuirmai iha modalidade voleibol feto FND 2026.
Iha sorin seluk, apoiantes no simpatizantes husi munisípiu rua nafatin fó apoiu no motivasaun ba sira-nia jogadór sira durante partida, liuliu bainhira ekipa sira aumenta pontu. Maski rezultadu diferente, apoiu husi komunidade kontinua sai motivasaun importante ba atleta sira.
(leo)






