DILI, STLTIMORLESTE.com — Prezidente Repúblika (PR), José Ramos-Horta taka ofisialmente Kongresu Dahuluk Eis Funsionáriu Lokál UNAMET, iha Dili, hodi hato’o agradesimentu ba timoroan sira-nia kontribuisaun durante referendu istóriku tinan 1999.
Iha diskursu iha Pantai Kelapa, kuarta-feira (28/10/2026) kalan, Xefe Estadu destaka funsionáriu lokál sira-nia papél nu’udar ponte entre komunidade internasionál no povu Timor-Leste, durante períodu ne’ebé nakonu ho violénsia, intimidasaun no instabilidade polítika.
Ramos-Horta subliña katak luta ba independénsia Timor-Leste hetan apoiu husi rezisténsia armada, rede klandestina no diplomásia internasionál.
“Ha’u hakarak hato’o ha’u-nia agradesimentu kle’an liu ba imi-nia servisu no dedikasaun,” Prezidente Ramos-Horta hatete.
Nia aumenta katak kontribuisaun funsionáriu lokál sira sei hela nafatin iha istória nasaun nian, no povu Timor-Leste sei la haluha sira-nia sakrifísiu.
Prezidente mós apela ba sidadaun hotu atu hamutuk dezenvolve ekonomia no harii futuru ne’ebé prósperu no hakmatek ba jerasaun tuirmai.
Iha diskursu ne’e, Ramos-Horta reafirma Timor-Leste nia solidariedade ba povu Palestinu no Kurdu, no subliña kompromisu ba direitus umanus no direitu ba autodeterminasaun iha nivel internasionál.
(eme)
