DILI, STLTIMORLESTE.com – Ministériu Edukasaun (ME) kontinua tau iha planu atu aumenta sala de aula iha eskola sira, hodi responde ba nesesidade estudantes nian.
Asuntu ne’e hato’o husi Diretór-Jerál Ensinu Pré-Escolár, Ensinu Baziku no Ensinu Rekorrente, Apolinário Serpa Rosa, ba STL, iha salaun Ian Martin Balide, Kinta-feira (29/10/2026).
Apolinário esplika katak, iha munisípiu balun, sala de aula ne’ebé harii ho pakote referéndu iha tempu uluk, hahú ona aat no presiza hadi’a ka harii foun.
“Loos duni, iha parte balun ne’ebé uluk hetan pakote referéndu, hanesan eskola balun iha Munisípiu Ermera no Ainaro, ne’ebé ha’u vizita semana kotuk, sei uza nafatin sala de aula sira ne’ebé kondisaun komesa aat ona. Maibé, munisípiu sira mós hatama ona nesesidade sala de aula iha planu. Bainhira Ministériu Edukasaun la hatama iha planu, munisípiu mak bele hatama liuhusi Programa Nasional Dezenvolvimentu Suku (PNDS),” dehan Apolinário.
Nia afirma katak, ME kontinua buka solusaun ba problema falta sala de aula iha eskola sira. Tuir nia, Ministra Edukasaun mós ko’alia ona kona-ba problema ne’e, tanba sei iha eskola balun ne’ebé seidauk iha sala de aula sufisiente ba estudantes.
Apolinário hatutan katak, konstrusaun sala de aula sei hala’o tuir planu no prioridade ne’ebé Governu determina ba setór edukasaun. ME sei planeia sala de aula hira mak atu harii iha tinan ida-idak, inklui tinan 2026 no tinan oin, hodi responde ba nesesidade eskola sira nian ho etapa.
Nia subliña katak, liuhusi planu konstrusaun ne’e, ME sei kontinua buka dalan atu responde gradualmente ba falta sala de aula iha eskola sira.
(jac)
