DÍLI, STLTIMORLESTE.com – Eskola Sekundariu Geral Fitun Naroman Timor Lorosae (FINANTIL) husu Ministériu Edukasaun atu reabilita edifísiu eskola ne’ebé kondisaun aat, tanba udan impede prosesu aprendizajen ba estudante no profesór sira.
Preokupasaun ne’e hato’o husi Adjunto Diretor Eskola Sekundária Jerál (ESG) FINANTIL, Sabino Ernesto ba STL iha Aimutin, Kinta-feira (29/10/2026).
Nia esplika katak, edifísiu eskola sira-nian iha kondisaun ne’ebé la di’ak, tanba ne’e, eskola submete ona relatóriu no proposta ba Ministériu Edukasaun (ME) no Ministériu Obras Públikas (MOP) atu hetan atensaun husi Governu.
“Edifísiu Eskola FINANTIL ladún di’ak. Ami hato’o ona relatóriu ba Ministériu Edukasaun kona-ba kondisaun edifísiu ne’e, atu Governu bele fó atensaun no halo konstrusaun foun. Ami nia proposta ne’e iha prosesu hela, maibé hein ona resposta desde 2024 to’o agora seidauk iha resposta,” nia dehan.
Sabino E husu ba Governu, liu liu Ministériu Edukasaun no Ministériu Obras Públikas, atu fó atensaun ba proposta ne’e no buka solusaun durante tinan 2026, atu nune’e bele hadi’a edifísiu ne’ebé iha kondisaun grave.
Nia hateten katak, husi edifísiu totál 7, eskola ne’e iha sala aula hamutuk 16, maibé sala aula 3 mak iha kondisaun grave.
Kondisaun ne’e sai problema ba prosesu aprendizajen, liuliu bainhira udan, tanba bee tama no akumula iha ambiente eskola, halo fatin hanesan kolam no akontese inundasaun. Situasaun ne’e impede atividade aprendizajen no halo estudante sira difisil atu kontinua estudu iha sala aula.
Nia konsidera katak, reabilitasaun edifísiu eskola no konstrusaun fasilidade ne’ebé seidauk kompletu importante tebes atu garante ambiente aprendizajen ne’ebé seguru no konfortável ba estudante no profesór sira.
Aleinde edifísiu, nia mos husu atu kompleta fasilidade hanesan laboratóriu informátika, atu apoia prosesu aprendizajen no hadi’a kualidade edukasaun iha eskola ne’e.
Sabino Ernesto relata katak, atualmente Eskola Sekundária Jerál FINANTIL iha estudante hamutuk 1.041, profesór 73 no funsionáriu administrativu 6.
Kona-ba ekipamentu eskola, nia afirma katak mesa no kadeira ba estudante sira kompletu no sufisiente, maibé prioridade agora mak hadi’a edifísiu no sala aula sira ne’ebé iha kondisaun grave.
(joa)
