DÍLI, STLTIMORLESTE.com – Hadi’a kualidade edukasaun presiza atensaun ba rekursu umanu, fasilidade eskola no distribuisaun profesór tuir área espesialidade.
Lia hirak ne’e hato’o husi Adjunto Diretór Eskola Sekundária Jerál (ESG) Fitun Naroman Timor Lorosae (FINANTIL), Sabino Ernesto, ba STL iha Eskola FINANTIL, Kinta-feira (29/10/2026).
Sabino esplika katak, dezenvolvimentu edukasaun iha Timor-Leste presiza apoiu husi Governu, liuliu atu garante rekursu umanu no fasilidade eskola ne’ebé sufisiente, tanba eskola balun iha territóriu sei hasoru problema kona-ba falta edifísiu, sala aula, mesa-kadeira, laboratóriu no biblioteka.
Nia husu ba Ministériu Edukasaun (ME) atu tau atensaun ba nesesidade fasilidade eskola sira, tanba preparasaun ambiente aprendizajen ne’ebé di’ak sai parte importante husi responsabilidade Governu atu garante prosesu aprendizajen lao ho di’ak no hadi’a kualidade edukasaun.
“Tanba ne’e, atu hadi’a kualidade edukasaun, presiza hadi’a parte rekursu umanu no fasilidade eskola. Iha eskola balun, profesór sei menus, no iha mos eskola balun ne’ebé profesór sira seidauk hanorin tuir sira-nia área espesialidade. Ida ne’e sai problema ida,” nia dehan.
Nia hatutan katak, Governu iha responsabilidade atu rekruta profesór tuir área ne’ebé sei menus, hodi kompleta nesesidade rekursu umanu iha eskola sira.
Ho profesór no fasilidade ne’ebé sufisiente, prosesu aprendizajen bele lao ho di’ak no estudante sira bele hetan edukasaun ho kualidade.
Sabino relata katak, durante tinan sira liubá, iha profesór balun ne’ebé aloka atu hanorin matéria la tuir sira-nia área espesialidade.
Maibé, tuir nia, situasaun ne’e hahu hadi’a gradualmente, no agora alokasaun profesór tuir área espesialidade sai di’ak liu kompara ho tempu uluk.
“Ami foin mai, haree katak iha profesór balun hanorin matéria ne’ebé la tuir sira-nia espesialidade.
Dala ruma, profesór Desportu hanorin matéria seluk. Ne’e mak situasaun uluk, maibé depois liu tinan rua, alokasaun profesór komesa lao di’ak liu,” nia esplika.
Maski nune’e, nia afirma katak Eskola FINANTIL sei presiza profesór tan, liuliu profesór Língua Portugés ida no profesór Ekonomia ida, atu responde ba nesesidade hanorin no kompleta falta profesór iha eskola ne’e.
Nia hein katak, Ministériu Edukasaun bele kontinua tau atensaun ba rekursu umanu no fasilidade eskola, atu estudante sira iha Timor-Leste bele hetan ambiente aprendizajen ne’ebé di’ak no edukasaun ho kualidade.
(joa)
