BAUCAU, STLTIMORLESTE.com – Prezidente Autoridade Munisípiu Baucau, Veneranda Lemos, husu komunidade tomak atu hametin seguransa no respeita orden durante selebrasaun Loron Finadu, 01 no 02 Novembru 2026.
Apelu ne’e nia hato’o ba STL iha edifísiu Administrasaun Munisípal Baucau, Sesta (30/10/2026), hodi konvida família, juventude, lideransa komunitária no entidade sira atu kolabora garante estabilidade durante selebrasaun loron sagradu hirak ne’e.
Veneranda Lemos esplika katak, loron 01 Novembru komunidade selebra Loron Santu hotu, enkuantu loron 02 Novembru selebra Loron Finadu. Iha loron rua ne’e, liuliu Loron Finadu, movimentasaun komunidade no família sira aumenta iha munisípiu, postu administrativu, suku no aldeia.
Nia husu ba família hotu no juventude feto no mane atu hamutuk proteje komunidade no an rasik, hodi garante selebrasaun ne’e hala’o ho dame, orden no estabilidade.
“Nudar ema Timor-oan no sarani fiar-na’in, ita tenke respeita loron boot hirak ne’e, liuliu Loron Finadu,” nia afirma.
Nia mós apela ba Baucau-oan sira atu hatudu ezemplu di’ak, ho responsabilidade no atitude pozitivu ba jerasaun tuirmai, liuliu iha preparasaun ba prosesu desentralizasaun administrativa no poder lokál.
Iha remata, Veneranda Lemos husu komunidade tomak atu kuidadu an no kolabora hametin seguransa, hodi asegura selebrasaun Loron Santu hotu no Loron Finadu iha Munisípiu Baucau hala’o ho susesu.
(tom)
