BAUCAU, STLTIMORLESTE.com – Negosiante sira iha Merkadu Tuanau, Munisípiu Baucau, lamenta tanba lakon oportunidade rendimentu husi preparasaun ba selebrasaun Loron Finadu, enkuantu negosiante balu kontinua faan sasan iha rotunda Vila Nova no Vila Antiga.
Iha observasaun STL iha Sábadu (31/10/2026), Merkadu Lokal Suku Seiçal nakonu ho kompradores ne’ebé mai sosa modo no produtu seluk ba preparasaun Loron Finadu. Situasaun ne’e permite negosiante sira hetan rendimentu di’ak kompara ho loron bazar baibain.
Iha sorin seluk, iha área rotunda Vila Nova, Polísia Tranzitu Baucau kontinua organiza movimentu transporte públiku no privadu, enkuantu negosiante balu hahú faan modo no produtu lokál sira, ho kompradores sira mosu atu sosa sasan.
Maibé, situasaun diferente akontese iha Merkadu Tuanau. Representante negosiante sira, Olandina Mendonça, hato’o sentimentu triste tanba kompradores menus ba merkadu refere, ne’ebé kauza sira nia rendimentu tun.
“Agora ami terus, tanba ema la’o la to’o mai ami. Ami nia maluk sira ba faan tiha ona iha dalan ne’eba, oinsá mak ema atu mai? Loron boot hanesan ne’e mak ami hanesan povu atu buka rendimentu, maibé ami nia maluk sira taka ona dalan ba ami. Ema la’o la to’o mai ami, ami faan mós laiha ema atu sosa,” Olandina Mendonça dehan ba STL iha Merkadu Tuanau, Sábadu (31/10/2026).
Nia esplika katak, tinan rua liubá, Autoridade Munisipál Baucau liuhusi ekipa konjunta muda negosiante sira husi merkadu Beskem, Vila Nova no Vila Antiga ba Merkadu Tuanau, atu negosiante hotu-hotu hala’o atividade komersiál iha fatin ida.
Maibé, tuir Olandina, negosiante sira iha Tuanau kumpri desizaun ne’e, enkuantu negosiante balu ba fila fali faan sasan iha rotunda Vila Nova no Vila Antiga hodi impede kompradores ba merkadu Tuanau.
Nia kompara katak, bainhira hala’o negósiu iha Vila Nova, durante preparasaun ba Loron Finadu, sira hetan rendimentu di’ak tanba kompradores fasil asesu ba sira nia fatin fa’an.
“Durante tinan rua ona ami faan iha ne’e, maibé ema ida la mai haree ami. Ami atu halai tuir maluk sira ba faan iha rotunda Vila Nova, maibé ami nia transporte laiha. Entaun, atu mate ka moris, ami hela de’it ona iha ne’e,” Olandina dehan.
Nia husu Autoridade Munisipál Baucau atu aplika desizaun jestaun merkadu ho justu, hodi garante negosiante hotu-hotu hala’o negósiu iha fatin ne’ebé autoridade determina.
“Se na’in ulun sira hatene ukun ema, tau ami hamutuk iha fatin ida ne’e mak foin bazar rame. Maibé, ami faan fahe malu hanesan ne’e, bazar hela iha ne’e la di’ak. Ami ne’ebé la hatene la’o no hala’o negósiu bele mate tanba la hetan hahán, enkuantu sira ne’ebé hatene halai ba fatin seluk mak moris,” nia kestiona.
Olandina konsidera katak, preparasaun ba Loron Finadu iha Baucau sei aumenta movimentu komersiál iha Domingo (01/11/2026), tuir loron bazar merkadu Baucau nian. Maibé, nia preokupa katak negosiante sira iha Tuanau sei nafatin hasoru difikuldade se kompradores kontinua ba sosa iha fatin seluk liuliu rotunda Vila Nova no Vila Antiga.
“Ami ne’e ema boot ba ami laiha, husik hela ami abandona. Ami atu halo oinsá mak di’ak? Estadu ukun ami mós, ami nia direitu ne’e ba fali kotuk,” Olandina dehan.
Nia rekomenda ba Autoridade Munisipál Baucau, liuliu ekipa Jestaun Merkadu Munisipál, atu kontrola no organiza negosiante sira ne’ebé kontinua faan iha rotunda Vila Nova no Vila Antiga, hodi garante negosiante hotu-hotu hala’o atividade iha Merkadu Tuanau.
Nia preokupa katak, se autoridade la foti medida, negosiante sira ne’ebé kumpri desizaun no kontinua faan iha Tuanau sei enfrenta lakon rendimentu no bele abandona sira nia atividade komersiál.
Preokupasaun hanesan ne’e mós hato’o husi negosiante modo, Fortunato das Neves, ne’ebé lamenta tanba negosiante balu kontinua faan iha rotunda Vila Nova no Vila Antiga.
“Sira ne’ebé agora hala’o negósiu iha rotunda Vila Nova no Vila Antiga hetan rendimentu di’ak tanba sira faan besik komunidade. Maibé, ami iha Tuanau faan iha ailaran tuan. Sé mak atu mai sosa modo sira ne’e? Dala ruma, modo estraga de’it,” Fortunato dehan.
Nia konsidera katak, ekipa Jestaun Merkadu Munisipál Baucau seidauk hatudu asaun efetiva atu rezolve problema ne’e, maski negosiante sira hato’o ona kestaun ne’e liuhusi média oioin.
To’o notísia ne’e publika, STL seidauk hetan komentáriu husi ekipa Jestaun Merkadu Munisipál Baucau kona-ba keixa negosiante sira nian, tanba autoridade relevante sira iha tempu feriadu.
(tom)
