MAUBISSE, STLTIMORLESTE.com – Negosiante sira iha Merkadu Maubisse hetan aumentu rendimentu durante loron finadu, tanba viajante barak para atu sosa produtu lokál.
Negosiante Paulina Martins dehan, nia hetan rendimentu liu US$ 50 iha Sábadu (31/10/2026), kompara ho loron normál ne’ebé nia hetan de’it US$ 20.
“Ohin dadeer to’o agora, hau hetan ona rendimentu liu US$ 50, kompara ho loron bai-bain ne’ebé hau hetan de’it US$ 20,” Paulina dehan.
Nia esplika katak, aumentu rendimentu ne’e akontese tanba viajante barak husi Díli ba munisípiu sira para iha Merkadu Maubisse atu sosa modo no produtu seluk.
“Ohin ema barak para iha ne’e atu sosa modo, hanesan koto, modo-tahan, senoura, repollu, aimanas no produtu seluk tan,” nia hateten.
Paulina informa katak, koto nurak fa’an ho folin US$ 1 to’o US$ 2 kada balde, enkuantu modo mutin, modo metan, salsa no aimanas fa’an US$ 1.
Nia aumenta katak, bua-kesak haat fa’an US$ 1, enkuantu talas fa’an ho folin US$1 to’o US$ 2.
Nia esplika katak, produtu sira ne’ebé nia fa’an mak sosa tutan husi ema seluk, no atualmente negosiante sira fa’an iha estrada ibun tanba merkadu sei hadi’a hela.
“Modo ne’ebé ami fa’an ne’e ami sosa tutan husi ema seluk. Ami sei fa’an iha estrada ibun tanba merkadu sei hadi’a hela,” nia informa.
Entretantu, konsumidór António Barreto dehan, nia ho família halo viajen husi Díli ba Munisípiu Covalima no para iha Merkadu Maubisse atu sosa produtu lokál.
“Tanba loron finadu, ohin ami ho família halo viajen husi Díli ba Covalima. Ami para iha ne’e atu sosa modo,” António dehan.
Nia hateten katak, produtu sira ne’ebé família sosa inklui koto, senoura, talas, tomate no modo seluk atu prepara ba nesesidade durante loron finadu.
Tuir observasaun STL iha terrenu, Sábadu (31/10/2026), negosiante barak fa’an sira-nia produtu iha estrada ibun besik Merkadu Maubisse, tanba infraestrutura merkadu ne’e sei iha prosesu hadi’a hela.
(jac)
