AMBENO, STLTIMORLESTE.com – Prezidente Autoridade Rejiaun Administrativa Espesiál Oecusse-Ambeno (PA-RAEOA) hamutuk ho Centro Nasionál Reabilitasaun (CNR) distribui kadeira-rodas ba Maluk Ema ho Defisiénsia (EhD), nu’udar forma apoiu atu fasilita sira-nia mobilidade, asesu ba servisu no partisipasaun iha moris sosial.
Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu iha serimonia distribuisaun kadeira ba EhD afirma katak, apoiu ba EhD la’ós de’it responsabilidade Governu, maibé presiza envolve família, komunidade, setór privadu no parseiru dezenvolvimentu sira.
Nia esplika katak, Governu iha kompromisu atu promove inkluzaun sosiál no asegura katak ema ho defisiénsia hetan asesu ba servisu reabilitasaun no atendimentu ne’ebé apropriadu. Tanba ne’e, mekanizmu koordenasaun entre instituisaun relevante sira presiza kontinua hametin.
Regio da Cruz Salu mós apela ba família no komunidade atu la abandona ema ho defisiénsia, maibé fó apoiu moral, solidariedade no akompanhamentu, hodi asegura sira bele moris ho dignidade no partisipa ativu iha sosiedade.
Nia konsidera katak, apoiu ba EHD tenke sai responsabilidade hamutuk, inklui envolvimentu setór ekonómiku no emprezáriu sira, atu kria oportunidade no fasilidade ne’ebé permite ema ho defisiénsia asesu ba atividade sosial no ekonómika.
Distribuisaun kadeira-rodas ne’e realiza husi PA-RAEOA, ho fasilidade husi Centro Nasionál Reabilitasaun (CNR), iha Salaun Gabinete Autoridade RAEOA, Oebau, Suku Costa, Postu Administrativu Pante Makassar, Oecusse, Sesta-feira (30/10/2026).
Iha biban nee benefisiáriu kadeira roda, Maria Auxiliadora Mariuni nuudar inan husi nia oan, sente kontente tanba Governu oferese kadeira roda ba ninia oan.
“Ha’u hato’o agradeseimentu no obrigadu barak ba Governu Timor-Leste, tanba fó apoiu ba ami-nia oan ne’ebé iha defisiénsia. Ha’u agradese tebes ba Governu tanba konsidera no fó atensaun ba ami-nia oan. Obrigadu barak ba Governu Timor-Leste,” dehan nia.
(jos)
