AMBENO, STLTIMORLESTE.com – Prezidente Autoridade Rejiaun Administrativa Espesiál Oecusse-Ambeno (PA-RAEOA), Regio da Cruz Salu apela ba família no komunidade katólika sira atu aproveita loron feriadu relijiozu hodi hamutuk ho família, halo orasaun no partisipa iha atividade espirituál, inklui kari aifunan morin, hanesan ai-kameli, duke uza aifunan artifisiál ka plastiku.
Regio da Cruz Salu hato’o apelu ne’e ba jornalista sira iha Gabinete RAEOA, Oebau, Sesta (30/10/2026), husu ba família sira atu uza tempu feriadu ne’e atu hametin relasaun família, vizita igreja no partisipa iha atividade orasaun, nu’udar parte importante husi moris espirituál no tradisaun komunidade katólika.
Nia mós enkoraja komunidade atu envolve an iha programa kuda ai-horis, liuliu ai-horis ne’ebé bele moris no dezenvolve naturalmente, hodi kontribui ba konservasaun ambiente no garante sustentabilidade ba jerasaun tuirmai.
Tuir nia, programa kuda ai-horis bele envolve família katólika sira hodi hametin konsiénsia kona-ba importánsia ai-horis naturál no hamenus utilizasaun aifunan artifisiál ne’ebé bele aumenta fo’er no la fó benefísiu ba ambiente.
Iha parte seluk, autoridade mós fó hanoin ba komunidade atu respeita kalendáriu feriadu nasionál no kumpre regra sira ne’ebé aplika durante loron feriadu, hodi evita atividade ne’ebé la tuir norma.
Regio da Cruz Salu enfatiza katak, loron feriadu relijiozu iha valór espirituál no kulturál importante ba komunidade katólika, la’ós de’it iha Timor-Leste, maibé mós iha mundu tomak.
Enkuantu ne’e, Domingos Colo, nu’udar membru komunidade Oesono, manifesta kontentamentu tanba loron finadu ne’e fó oportunidade ba família sira atu halibur malu no kari aifunan ba matebian sira, nu’udar jestu atu hanoin no fó omenajen ba sira ne’ebé durante moris dedika an ba família.
“Iha loron finadu ne’e, ita halibur malu nu’udar família boot iha knua no fatin moris, hodi agradese ba matebian sira ne’ebé durante sira-nia moris dedika an atu serbí família,” dehan Domingos Colo.
Nia mós husu ba família hotu-hotu atu uza loron finadu ne’e hodi kria dame no pás, hahú husi família rasik to’o iha sosiedade tomak.
(jos)
