DÍLI, STLTIMORLESTE.com – Padre Paulos Maia apela ba sarani sira atu kontinua reza no halo hahalok diak ba matebian sira, laós iha Loron Finadu deit, maibé loroloron.
Padre Paulos Maia hatoo apelu nee durante omilia iha selebrasaun misa Loron Finadu, iha Igreja Katedrál Díli, Segunda-feira (02/11/2026).
Nia hateten katak, Komemorasaun Loron Finadu, neebé selebra kada 2 Novembru, sai ona tradisaun importante ba sarani sira atu hanoin no reza ba maluk matebian.
Nia subliña katak, hanesan sarani no sidadaun Timor-Leste, ema hotu iha responsabilidade atu komemora no hanoin matebian sira kada tinan.
Padre Paulos esplika katak, tuir orientasaun Papa Bento XVI, iha Loron Finadu sarani sira bele selebra misa tolu ho intensaun diferente.
“Primeira misa ita reza ba matebian hotu, sarani ka lae. Segunda misa ba sarani sira, no terceira misa ba ita-nia família sira,”nia esplika.
Nia hateten katak, selebrasaun nee mós fó hanoin ba sarani sira kona-ba doutrina Katólika neebé fahe Igreja ba parte tolu, hanesan Igreja Peregrina, Igreja Purgante no Igreja Triunfante.
Padre Paulos esplika katak, Igreja Triunfante kompostu husi ema fiar-nain sira neebé mate ona no goza felicidade eterna iha Reinu Maromak nian.
Enkuantu Igreja Purgante refere ba klamar sira neebé sei iha purgatóriu, neebé presiza purifikasaun molok tama ba felicidade eterna hamutuk ho Maromak.
Tanba nee, nia hateten katak, loron 2 Novembru sai tempu espesial ba sarani sira atu reza ba klamar sira neebé sei iha purgatóriu.
Nia mós subliña katak, responsabilidade atu reza ba matebian sira la limita deit ba loron 2 Novembru, maibé tenke kontinua iha moris loroloron.
Padre Paulos husu ba sarani sira atu laós reza deit, maibé moris tuir hahalok diak, tanba orasaun no hahalok diak bele tulun klamar sira.
Ita-nia orasaun bele tulun sira, maibé ita tenke mós komporta ho diak,nia dehan.
Nia hatutan katak, purgatóriu mak fatin temporáriu ba purifikasaun klamar nian, molok sira tama ba felicidade eterna hamutuk ho Maromak.
Iha parte seluk, Igreja Peregrina refere ba ema hotu neebé sei moris iha mundu no kontinua reza ba matebian sira.
Padre Paulos mós hateten katak sarani sira tenke fiar katak matebian sira iha Maromak nia oin bele reza ba ema sira neebé sei moris iha mundu.
Nia enkoraja sarani sira atu kontinua hasae orasaun no halo misa ho intensaun ba matebian sira, hodi hametin relasaun espirituál entre Igreja Peregrina no matebian.
Iha ikus, Padre Paulos apela ba sarani sira atu hametin fiar no esperansa iha Maromak nia Mizerikórdia, tuir mensajen Evanjellu São Mateus kona-ba konvite Jesus ba ema hotu atu mai besik nia.
(alb)
