AMBENO, STLTIMORLESTE.com – Igreja Katólika husu fiéis sira atu komemora loron matebian ho fiar, domin no esperansa ba moris eternu, hodi hanoin no reza ba sira ne’ebé mate ona, tuir fiar katak Kristu mak moris no naroman ne’ebé lori umanidade ba salvasaun.
Amu Furanu Parokial Nossa Senhora do Rosário Oecusse, Pe. Carlos Dedeus, hato’o mensajen ne’e durante selebrasaun Komemorasaun Fiéis Defuntu, iha Igreja Tuan Santo António, Oecusse, Segunda-feira (02/11/2026).
Iha nia reflexão, Pe. Carlos Dedeus esplika katak komemorasaun loron matebian la’ós de’it tempu atu vizita rate, hamos rate no sunu lilin, maibé momentu importante atu fiéis sira hamos mós sira-nia fuan, hafoun fiar no valoriza ema sira ne’ebé sei moris.
Nia enfatiza katak, sarani sira tenke hadomi Kristu no moris tuir nia hanorin, tanba Kristu mak naroman no fonte esperansa ba moris umanu. Tanba ne’e, fiéis sira tenke valoriza ema moris, hadomi malu no halo buat di’ak durante tempu moris iha mundu.
“Antes hamos rate, hamos uluk ita-nia fuan. Antes valoriza matebian, valoriza uluk ema moris. Ita sunu lilin tanba ita fiar katak Kristu mak Naroman,” nia afirma.
Amu Furanu ne’e mós hanorin katak mate la’ós rohan ba buat hotu, maibé ba ema ne’ebé fiar iha Kristu, mate sai dalan ida ne’ebé lori sira ba moris eternu hamutuk ho Maromak.
Nia hateten katak, maski ema ida mate ona, fiéis sira labele lakon esperansa, tanba Kristu rasik hatudu katak mate la iha liafuan ikus. Hanorin ne’e bazeia ba Evanjellu Santu João 11:25, ne’ebé Jesus dehan: “Hau mak moris-hikas no moris. Ema ne’ebé fiar mai Hau, maski mate, sei moris.”
Nia mós bolu fiéis sira atu reza ba matebian hotu, liuliu família, belun no maun-alin sira ne’ebé husik ona mundu ne’e, atu sira hetan hakmatek no deskansu rohan-laek iha Maromak nia reinu.
Iha mensajen ne’e, Pe. Carlos Dedeus lembra katak moris mak prezente ida mai husi Maromak. Tanba ne’e, ema ida-idak tenke uza nia tempu moris atu halo buat di’ak, hadomi malu no ajuda ema seluk.
Nia esplika katak, buat importante la’ós ema moris kleur ka badak, maibé oinsá ema ida moris. Ema nia valor la sukat husi riku-soin ka kbiit, maibé husi domin, solidariedade no hahalok di’ak ne’ebé nia husik ba ema seluk.
“Importante mak oinsá ita moris. Ita-nia valor la sukat husi riku-soin ka kbiit, maibé husi domin no buat di’ak ne’ebé ita husik ba ema seluk,” nia dehan.
Ami Furanu ne’e mós fó hanoin katak loron ida ita hotu sei husik mundu ne’e, no Maromak mak hatene loron ne’ebé ema ida sei fila ba nia. Tanba ne’e, fiéis sira tenke prepara an, moris ho domin, sakrifísiu no bondade, atu bainhira to’o tempu fila ba Maromak, sira bele hetan moris eternu.
Iha parte ikus, nia husu fiéis sira atu la limita komemorasaun matebian ba loron ida de’it, maibé kontinua reza no halo buat di’ak hodi fó hanoin ba matebian sira, tanba domin no fiar mak ligasaun ne’ebé kontinua iha família Maromak.
(jos)
