AINARO, STLTIMORLESTE.com — Loron Matebian lori sarani Katólika barak nakonu iha Semitériu Públiku Ainaro, atu tuir Missa solene no reza ba família sira ne’ebé mate ona.
Iha loron 2 Novembru 2026, sarani sira halibur iha semitériu ne’e ho fiar no devosaun, hodi komemora Loron Matebian ka Fiél Defuntu, no hasa’e orasaun ba klamar sira ne’ebé deskansa ona.
Antes Missa solene hala’o iha Semitériu Públiku Ainaro, tuku 10:00 dader, ne’ebé prezide husi Padre Norberto, sarani sira partisipa uluk iha Missa dadeer iha Igreja Parokia Ainaro.
Hafoin Missa remata, sarani sira ba vizita família nia rate, tau aifunan mutin no mean, sunu lilin no hasa’e orasaun. Tristeza no saudade sai parte husi komemorasaun ne’e.
Ba família balun, Loron Matebian la’ós de’it tradisaun relijioza, maibé oportunidade atu fila fali ba rate no hanoin ema doben sira ne’ebé la iha ona.
Sarani husi Suku Ainaro Vila, Maria de Jesus, hatete katak nia kontente bele partisipa iha Missa ne’ebé hala’o diretamente iha semitériu, besik nia laen nia rate.
“Ohin ha’u mai ho oan sira, lori aifunan no lilin ba ha’u-nia laen nia rate. Ami triste, maibé kontente bele reza hamutuk ba nia,” dehan Maria ba STL, iha Semiteriu Ainaro, Segunda (02/11/2026).
Maria esplika katak nia laen mate ona tinan lima liubá, maibé nia ho oan sira kontinua hanoin no reza ba nia loroloron, liuliu iha Loron Matebian.
“Maske nia la iha ona, ami-nia domin ba nia nafatin. Ami fiar katak nia haree ami husi Lalehan, no ami-nia orasaun sei to’o ba nia,” Maria hatutan.
Iha parte seluk, sarani João Mendonça hatete katak, maski nia hela iha Dili, tinan-tinan nia fila nafatin ba Ainaro atu reza iha nia inan-aman sira-nia rate.
“Tinan-tinan ha’u fila mai Ainaro, maski hela iha Dili. Ha’u hakarak hamutuk ho família reza ba inan-aman sira. Ida-ne’e obrigasaun ida nu’udar oan,” dehan João.
Ba João, distánsia entre Dili no Ainaro la sai impedimentu atu fila ba rai moris-fatin, hodi komemora Loron Matebian hamutuk ho família boot.
Entretantu, autoridade lokál no Komisaun Semitériu Ainaro fó apresiasaun ba sarani sira ne’ebé partisipa iha Missa ho orden no mantein área semitériu moos.
(car)
