BOBONARO, STLTIMORLESTE.com – Selebrasaun Loron Finadu durante loron 01 no 02 Novembru 2026, iha Postu Administrativu Bobonaro, Munisípiu Bobonaro, lao ho hakmatek, tanba kontribuisaun masimu husi entidades hotu.
Komandante Eskuadra Polísia Bobonaro, Constantino Domingos de Carvalho hateten katak, durante preparasaun to’o selebrasaun Loron Finadu, Polísia Eskuadra Bobonaro hamutuk ho Batalhaun Ordem Públika (BOP), hala’o patrulla masiva iha suku sira hodi asegura seguransa no ordem públika.
“Sim, situasaun lao hakmatek. Ita fó informasaun no halo koordenasaun la’ós ho parte seguransa de’it, maibé mós ho xefe suku, xefe aldeia, delegadu no KPK sira. Ita halo sosializasaun to’o iha suku, aldeia no bairru sira,” hateten Constantino Domingos de Carvalho ba jornalista sira iha Bobonaro, Segunda (02/11/2026).
Nia esplika katak, Postu Administrativu Bobonaro iha suku 18 no aldeia 63, ho área luan 217,13 km² no populasaun hamutuk ema 34.199. Maski nune’e, durante loron 01 no 02 Novembru, situasaun seguransa lao hakmatek, tanba kolaborasaun husi komunidade, liuliu joven sira.
Nia rekoñese katak, selebrasaun Loron Finadu ne’ebé akontese tinan ida dala ida, normalmente halibur família sira atu han no hemu hamutuk. Inklui sidadaun balu ne’ebé konsume bebida alkóolika, maibé autoridade seguransa kontinua kontrola situasaun.
“Finadu ne’e tinan ida dala ida, balu hemu tua uitoan no lanu, maibé situasaun kontroladu durante loron hirak ne’e,” nia afirma.
Aleinde ne’e, nia informa katak, bazeia ba desizaun autoridade suku 18 no Autoridade Postu Bobonaro, husi loron 31 Outubro to’o 04 Novembru, sidadaun sira hetan limitasaun atu hariis iha Bee Manas Marobo no Bee Morna Borluli.
Relasiona ho medida ne’e, Polísia hala’o patrulla iha área refere no identifika joven sira ne’ebé vizita fatin hirak ne’e. Maibé, tuir nia esplikasaun, joven sira ne’ebé ba hariis iha fatin refere tanba sira laiha bee iha uma.
“Ita halo patrulla ba ne’ebá, iha duni joven sira iha ne’ebá tanba sira laiha bee iha uma, entaun sira tun ba hariis. Maibé ita halo identifikasaun ba sira iha Bee Manas no laiha problema,” nia hatutan
Bobonaro Bandu Piknik, Turizmu no Konsumu Tua Durante Finadu
Bazeia ba karta avizu ne’ebé STL asesu, Autoridade Postu Administrativu Bobonaro emite ona Sirkulár ho númeru 144/APA BOB/X/2026, ne’ebé estabelese regra no medida sira durante períodu selebrasaun Loron Finadu, bandu atividade piknik, turizmu no konsumu bebida alkóolika iha área públika durante períodu selebrasaun Loron Finadu, hahú hosi 31 Outubru to’o 4 Novembru 2026.
“Loron finadu atu reza ba matebian la’os loron festa tan ne’e bandu labele piknik iha fatin turizmu hotu sei taka, labele hemu tua iha dalan ninin no loja ninin no labele halo barollu iha rate laran,” hateten Administrador Postu Bobonaro Thomas Barreto Henriques iha karta sirkular
Iha sirkulár ne’e, Administradór Postu Bobonaro, Thomas Barreto Henriques, esplika katak Loron Finadu mak tempu atu reza no hato’o orasaun ba matebian, la’ós loron atu halo festa no hala’o piknik ka atividade turizmu iha fatin turístiku sira inklui konsume bebida alkóolika iha dalan no loja, no halo barullu besik rate ka semitériu, parte Polísia Eskuadra Postu Bobonaro sei konfiska bebida alkóolika no lori ba postu polísia.
Maibé durante selebrasaun loron finadu iha Postu Bobonaro, la’o hakmatek, tanba kooperasaun husi entidades hotu.
(tom)
