DÍLI, STLTIMORLESTE.com – Prezidente Repúblika (PR), José Ramos-Horta hato’o parabéns ba feto sira iha Timor-Leste, Ne’ebé ohin selebrasaun Loron Feto Nasionál ba dala 50.
Prezidente Repúblika hato’o mensajen ne’e iha loron 3 Novembru 2026, hodi apela ba Estadu no sosiedade atu garante igualdade jéneru no inkluzaun sosiál.
Iha mensajen ne’e, Ramos-Horta afirma katak Governu no Estadu iha responsabilidade atu promove igualdade entre feto no mane iha sosiedade.
“Nu’udar Estadu no sosiedade, ita hotu iha responsabilidade atu garante igualdade jéneru no inkluzaun sosiál”, deklara Prezidente Repúblika.
Nia mós apela ba mane no labarik-mane sira atu sai parseiru iha promosaun direitu feto nian no esforsu atu hapara violénsia doméstika.
“Sá mak ita halo bainhira ita la rekoñese direitu feto sira nian? Ita hanesan la respeita no la rekoñese ita-nia inan rasik”, afirma Ramos-Horta.
Nia enkoraja sidadaun hotu atu hamutuk harii sosiedade ne’ebé respeita direitu ema hotu nian, la iha diskriminasaun.
“Mai ita hotu hamutuk harii Timor-Leste ne’ebé la iha diskriminasaun”, deklara Prezidente Repúblika.
Loron Feto Nasionál iha Timor-Leste marka kontribuisaun no luta feto sira nian ba direitu, igualdade no partisipasaun iha dezenvolvimentu nasaun. Selebrasaun ne’e sai mós oportunidade atu hametin kompromisu Estadu no sosiedade ba protesaun direitu feto nian.
(eme)
