BOBONARO, STLTIMORLESTE.com – Polísia Eskuadra Bobonaro detén estudante na’in rua no joven balu tanba lanu alkohol interompe movimentasaun iha estrada públiku.
Komandante Eskuadra Bobonaro, Constantino Domingos de Carvalho, hateten katak kazu ne’ebé akontese iha Suku Maliubu, Postu Administrativu Bobonaro, iha loron 31 Outubru 2026, parte kalan envolve estudante na’in rua, ida husi Universidade da Paz (UNPAZ) no ida seluk finalista husi Universidade Nasionál Timor Lorosa’e (UNTL), hamutuk ho joven balu ne’ebé foin hasoru malu no konsume bebida alkóolika.
“Kazu malubu ne’e iha estudante na’in rua, ida husi UNPAZ, ida finalista husi UNTL, hamutuk ho joven balu ne’ebé foin hasoru malu iha ne’e sira hemu tua. Tanba alkóol domina ona sira, sira la’ós halo problema, maibé sira palan estrada no husu ema,” Constantino Domingos de Carvalho hateten ba jornalista sira iha Bobonaro, Segunda (02/11/2026).
Nia subliña, relasiona kazu ne’e Polísia Eskuadra Postu Bobonaro simu informasaun direita husi tereñu no orienta kedas ekipa partrollu hamutuk ho membru Batalhaun Ordem Públika (BOP), Kompaña Delta, konsege kaptura jovem no estudante na’in rua refere hodi lori ba edifisiu Polísia Eskuadra Bobonaro halo identifikasaun.
“Ita lori sira mai Eskuadra Bobonaro, halo identifikasaun hotu, hanoin katak keta fila halo problema. Entaun tuir oras ita liberta sira, hamutuk ho ami halo kamping baibain, sira mós koopera di’ak, no ohin sira fila ona ba uma,” nia hatutan.
Komandante ne’e mós aviza katak, se iha sidadaun ruma halo problema, Polísia sei kontinua prosesu tuir lei no ekipa investigasaun aplika ona Termu Identifikasaun no Residénsia (T.I.R.) ba ema sira ne’ebé envolve iha kazu refere.
Aleinde ne’e, nia mós refere ba kazu foun ida ne’ebé akontese iha Suku Ilat-Laun, ne’ebé sei hein prosesu investigasaun no prosedimentu tuirmai.
(tom)
