DÍLI, STLTIMORLESTE.com — Seleksaun futebol Sub-15 Timor-Leste remata partisipasaun iha FIFA U-15 World Cup and Festival 2026, ne’ebé hala’o iha Baku, Azerbaijão, ho pozisaun 173 husi nasaun 189 ne’ebé partisipa.
Bazeia ba klasifikasaun final torneiu nian, Timor-Leste disputa total jogu 10, ho vitória 3, empate 0 no derrota 7. Seleksaun nasional marka golu 13 no simu golu 37, ho diferensa golu menus 24.
Iha fase inisiál, Timor-Leste tama iha Grupo AF hamutuk ho Azerbaijão, Haiti, Andorra, Austrália no Israel. Maski la konsege hetan pontu iha faze ne’e, Timor-Leste kontinua kompetisaun iha Tier F, ne’ebé fó oportunidade ba seleksaun sira atu disputa pozisaun final.
Durante disputa iha Tier F, Timor-Leste hasoru seleksaun sira husi nasaun seluk, hanesan U.S. Virgin Islands, Grenada, Montserrat, Curaçao no São Tomé and Príncipe. Iha faze ne’e, Timor-Leste konsege hetan vitória tolu, maski hetan derrota rua.
Rezultadu jogu Timor-Leste iha Tier F:
Data Jogu Rezultadu
28/10/2026 U.S. Virgin Islands vs Timor-Leste 1–3
28/10/2026 Grenada vs Timor-Leste 3–2
29/10/2026 Montserrat vs Timor-Leste 4–1
29/10/2026 Curaçao vs Timor-Leste 1–2
30/10/2026 São Tomé and Príncipe vs Timor-Leste 0–3
Ho rezultadu hirak ne’e, Timor-Leste remata Tier F iha pozisaun 13.º, ne’ebé ekivalente ho pozisaun 173 husi nasaun 189 iha klasifikasaun jerál torneiu nian.
Partisipasaun ne’e sai esperiénsia importante ba jogadór Sub-15 Timor-Leste atu hasoru seleksaun internasionál husi kontinete diferente. Vitória tolu ne’ebé hetan iha torneiu ne’e hatudu katak ekipa kontinua iha kapasidade atu kompete no buka rezultadu pozitivu.
Maski remata iha pozisaun 173, esperiénsia iha Azerbaijão bele sai hanorin ba futuru, liuliu iha preparasaun fízika, organizasaun defensiva, estratéjia no dezenvolvimentu futebol juvenil iha Timor-Leste.
(leo)
