BOBONARO, STLTIMORLESTE.com – Estrada munisipál ne’ebé liga Maliana Vila ho Postu Administrativu Bobonaro, distánsia besik kilometru 17, atualmente iha kondisaun grave, ne’ebé difikulta movimentasaun transporte públiku no privadu.
Administradór Postu Administrativu Bobonaro, Thomas Barreto Henriques, hateten katak estrada husi Maliana Vila to’o Postu Bobonaro presiza reabilitasaun tanba sai hanesan infraestrutura importante ba dezenvolvimentu komunidade, liuliu iha área ekonomia, edukasaun no saúde.
Nia hateten, maski iha estrada balu iha territóriu nasionál, inklui trosu Letefoho–Atsabe–Lourba Bobonaro, ne’ebé hahú ona prosesu lansamentu fatuk dahuluk, maibé estrada Maliana–Bobonaro to’o agora seidauk hetan reabilitasaun.
“Husi Maliana to’o mai Uaileu ne’e 17 kilometru, ha’u ba hasoru ona Ministru dala tolu. Presiza duni halo reabilitasaun ba estrada ne’e, tanba estrada ne’e mak baze ida atu halo mudansa moris ba ita nia komunidade iha parte ekonomia, edukasaun no saúde,” Administradór Postu Bobonaro, Thomas Barreto Henriques, hateten ba jornalista sira iha Bobonaro, Segunda (02/11/2026).
Nia esplika katak Autoridade Postu Bobonaro hasoru ona Ministru Obras Públikas, Samuel Marçal, hato’o problema estrada refere.
Tuir nia informasaun, levantamentu ba estrada ne’e hala’o ona no hetan verifikasaun husi Ajénsia Dezenvolvimentu Nasionál (ADN).
“Tuir ha’u hatene, tender mós sira loke tiha ona, manán-na’in mós iha ona. Iha tempu badak sei halo lansamentu,” Thomas hateten.
Nia manifesta esperansa katak Governu sei hahú reabilitasaun estrada refere iha tempu besik, atu fasilita asesu transporte no servisu báziku ba komunidade.
Kada Tinan Tempu Bailoron, Bobonaro Vila Sosa Bee Moos
Administradór Postu Bobonaro mós relata katak Postu Administrativu Bobonaro iha suku 18, maibé komunidade iha suku balu enfrenta difikuldade asesu bee moos durante tempu bailoron, tanba falta fonte bee permanente ne’ebé bele kanaliza ba komunidade.
“Ha’u hanoin, iha ne’e ita nia programa PNDS mós haree ba buat hirak ne’e. Iha mós programa UNDP ne’ebé fasilita bomba bee, maibé depende ba kondisaun terenu de’it,” nia esplika.
Nia fó ezemplu Suku Lour, ne’ebé hetan apoiu instalasaun sistema kanalizasaun bee moos ho bomba husi mota, maibé atualmente makina bomba bee refere avaria. Kondisaun ne’e obriga komunidade balu ba buka bee moos iha suku viziñu, no balu seluk tenke sosa bee.
Tomas informa katak sosa bee moos durante tempu bailoron sai ona hanesan realidade ne’ebé komunidade Bobonaro enfrenta kada tinan.
Komunidade sira maioria sosa bee husi kareta-tanki privadu, ho kapasidade litru 5.000, ho folin US$50 kada kareta.
Aldeia Balu iha Bobonaro Seidauk Asesu Eletrisidade
Aleinde problema bee moos, Thomas Barreto Henriques mós hateten katak instalasaun eletrisidade kuaze atinji ona suku 18 iha Postu Bobonaro, maibé aldeia balu seidauk asesu servisu eletrisidade.
Nia informa katak Governu iha planu atu kontinua instalasaun rede eletrisidade ba aldeia sira ne’ebé seidauk asesu, maibé sei hein prosesu tenderizasaun.
“Hanesan iha Suku Lour, aldeia tolu seidauk asesu. Iha Suku Colimau mós Aldeia Biamaus. Aldeia seluk asesu hotu ona. Kona-ba númeru uma-kain ha’u la hatene, maibé ne’ebé ha’u hatene mak aldeia sira de’it,” nia hatutan.
(tom)
