DILI, STLTIMORLESTE.com – Primeiru-Ministru (PM), Kay Rala Xanana Gusmão marka prezensa iha Semitériu Santa Cruz, Dili, iha dadeer, Segunda-feira (02/11/2026), antes selebrasaun misa ba matebian sira, hodi partisipa iha atividade limpeza no apoia negosiante ki’ik sira.
Xanana Gusmão to’o iha semitériu ne’e hamutuk ho ekipa seguransa, tuku 06:30 dadeer. Nia partisipa iha atividade rega rai, hamoos estrada no hadia ambiente iha oin semitériu.
Depois limpeza, Xanana hamutuk ho ekipa halibur labarik sira no sosa hahán ki’ik husi negosiante sira, atu fahe ba labarik no komunidade ne’ebé marka prezensa iha fatin ne’e.
Negosiante Amelia de Souza Araújo hateten katak nia sente kontente ho prezensa Primeiru-Ministru nian, tanba sosa diretamente sasan ne’ebé nia fa’an.
“Hau sente kontente tanba dadeer de’it, Avo Xanana mai iha ne’e hodi halibur labarik sira iha hau nia karoza oin, foti dosi sira ne’ebé hau fa’an nee fahe ba labarik sira,” dehan nia ba STL.
Amelia esplika katak, entre tuku 06:30 to’o tuku 08:00, Primeiru-Ministru sosa ona hahán ki’ik ho valor hamutuk US$ 40.
Nia hatutan katak, normalmente iha loron seluk, nia fa’an hahán ki’ik husi dadeer to’o lokraik foin hetan osan US$ 40.
Negosiante Tiga Roda, Jovi Gusmão, ne’ebé mak kaben Amelia, mós konfirma katak Primeiru-Ministru to’o iha fatin ne’e hamutuk ho ekipa seguransa no negosiante sira.
Jovi hateten katak nia hahú rega rai no estrada iha oin semitériu antes Primeiru-Ministru to’o. Bainhira Xanana to’o, nia mós partisipa iha atividade limpeza.
“Avo tun husi kareta mai haree hau rega hela. Avo mos mai hamoos no rega semitériu oin nee.”
Depois atividade limpeza, Xanana kontinua hamoos rate finadu Sebastião, antes halibur labarik sira atu fahe hahán ki’ik ne’ebé faan husi nia rasik no nia kaben Amelia.
Enkuantu ne’e, negosiante Albertina Pereira hateten katak nia la hetan oportunidade atu fa’an produtu ba Primeiru-Ministru tanba nia to’o tarde iha fatin ne’e.
Albertina esplika katak, nia foin to’o iha tuku 07:39 atu tau produtu iha oin entrada prinsipál Semitériu Santa Cruz.
“Hau mai tarde, tuku 7:39 nee foin too mai tau sasan iha odamatan bot semiteriu Santa Cruz nia oin.”
Maski la hetan oportunidade atu fa’an produtu ba Primeiru-Ministru, Albertina hateten katak nia la sente triste tanba autoridade sira permite negosiante sira atu fa’an iha loron ne’e.
Nia relata katak, iha loron seluk, negosiante sira hetan limitasaun atu fa’an produtu iha estrada públika. Maibé iha loron ne’e, nia konsege hetan rendimentu US$ 10.
Produtu ne’ebé Primeiru-Ministru sosa inklui biskuit, suku, rapisadu, Beng-Beng, apolo no hahán ki’ik seluk atu fahe ba labarik sira.
Aleinde atividade limpeza no apoiu ba negosiante, komunidade ne’ebé marka prezensa atu partisipa iha misa no lori ai-funan ba rate matebian sira, aproveita mós oportunidade atu hasai fotografia hamutuk ho Primeiru-Ministru.
(dom)
