BOBONARO, STLTIMORLESTE.com – Anin boot akompaña udan maka’as sobu totál edifísiu eskola sala lima (5) iha Ensinu Baziku Sentrál (EBC) Tapo, Postu Administrativu Bobonaro, Munisípiu Bobonaro.
Xefe Suku Tapo, Xavier Cardoso Barreto, hateten katak edifísiu eskola ne’ebé hetan estragu refere iha sala tolu ba estudante terseiru siklu no sala rua ba estudante Ensinu Báziku, primeiru no segundu siklu.
Nia esplika katak edifísiu eskola sira ne’ebé hetan estragus balu konstrui liuhusi Programa Komunitáriu no Programa Nasionál Dezenvolvimentu Suku (PNDS). Maibé, udan no anin maka’as ne’ebé akontese iha 28 Dezembru 2025 rezulta edifísiu eskola sala lima ne’e sobu totál.
“Eskola ne’e anin sobu iha loron 28 Dezembru 2025, tanba iha momentu ne’ebá udan no anin maka’as, entaun anin sobu. Konsidera nu’udar dezastre boot,” Xavier Cardoso Barreto hateten ba STL iha Bobonaro, Tersa (03/11/2026).
Nia informa katak, akontesimentu ne’e la rezulta estudante sira hetan kanek, tanba iha momentu ne’ebá estudante sira tama ona iha periódu feriadu eskola ba tinan letivu 2025.
Xavier hateten katak, ba prosesu aprendizajen tinan letivu 2026, estudante sira uza edifísiu eskola provizóriu ho sala tolu ne’ebé uluk konstrui husi FALINTIL-Forsa Defeza Timor-Leste (F-FDTL).
Maibé Edifísiu ne’e mós hetan estragu tanba anin boot iha tinan 2023, maibé hetan ona reabilitasaun husi Ministériu Edukasaun ho apoiu no kontribuisaun husi komunidade Suku Tapo.
“Edifísiu eskola ne’ebé estudante sira uza agora la sufisiente, maibé utilizasaun ne’e provizóriu de’it, tanba reabilitasaun ne’ebé hala’o mak kategoria urjente,” Xavier dehan.
Tanba ne’e, Xavier husu ba autoridade kompetente sira atu kontinua fó atensaun no apoiu ba reabilitasaun edifísiu eskola sira, hodi garante ambiente aprendizajen ne’ebé di’ak ba estudante sira.
“Ita nafatin husu ba autoridade sira atu fó apoiu, tanba matéria reabilitasaun ne’ebé sira apoia seidauk sufisiente. Tanba ne’e, inan-aman sira mós kontribui hodi reabilita edifísiu eskola ne’ebé uluk konstrui husi F-FDTL, ne’ebé mós anin sobu iha tinan 2023,” nia esplika.
Administradór Postu Administrativu Bobonaro, Thomas Barreto Henriques hateten, problema infrastrutura sira ne’ebé hetan estragus no seluk tan, Autoridade Postu kontinua enkaixa iha planu prioridade Asembleia Postu Administrativu (AsPA) no sei diriji ba Munisípal hafoin tetu relata ba nasionál hodi hetan aprovasaun.
“Nee depende de’it ba ami nia planu, tanba iha ne’e iha programa ne’e AsPA iha ne’e mak ami deside prioridade kada tinan fó ba Munisípiu sira lori ba KRO mak tetu ida ne’ebé mak sai prioridade ba ita nia komunidade,” Thomas katak.
Parte Autoridade Postu mós kontinua koordena ho Servisu Munisípal Edukasaun Bobonaro atu solusiona problema edifisiu eskola refere ne’ebé hetan sobu husi anin no udan, tanba eskola ne’ebé atual uza hodi estudante sira partisipa prosesu aprendizajem anu letivu 2026, la sufisiente.
Xavier informa katak, totál estudante ne’ebé rejistu iha EBC no EBF Tapo, husi klase primeiru to’o klase nonu, hamutuk estudante na’in 320 resin.
(tom)
