DILI, STLTIMORLESTE.com – Primeiru-Ministru (PM), Kay Rala Xanana Gusmão no Prezidente Repúblika José Ramos-Horta hato’o apresiasaun ba povu Timor-Leste tanba selebrasaun Loron Finadu lao ho dame no hakmatek.
Xanana Gusmão hato’o deklarasaun ne’e ba jornalista sira, hafoin enkontru semanal ho Prezidente Repúblika, iha Palásiu Prezidensiál Nicolau Lobato, Bairo Pité, Dili, Kuarta-feira, 4 Novembru 2026.
“Ha’u no Prezidente kontente tanba Loron Finadu lao ho dame, no ita hotu bele hanoin no reza ba matebian sira,” Primeiru-Ministru Xanana Gusmão dehan.
Nia hato’o mós saudasaun ba povu tomak iha Timor-Leste, ne’ebé ho konsiénsia no responsabilidade kontribui atu mantein dame no hakmatek durante Loron Finadu.
Xanana fó apresiasaun espesiál ba juventude ne’ebé hatudu hahalok di’ak no komportamentu responsável durante selebrasaun Loron Finadu.
“Prezidente fó saudasaun espesiál ba juventude ne’ebé hatudu komportamentu di’ak. Ami kontente tebes,” Xanana dehan.
Iha biban nee Prezidente Repúblika José Ramos-Horta mós hato’o parabéns no kongratulasaun ba povu no juventude sira, tanba sira hatudu maturidade no responsabilidade hodi mantein dame.
Iha enkontru ne’e, Prezidente Repúblika informa katak, iha Kuarta-feira lokraik, nia sei halo viajen ba Repúblika Koreia atu hasoru Prezidente no Primeiru-Ministru nasaun ne’e.
Ramos-Horta mós hato’o agradesimentu ba Ajénsia Kooperasaun Internasionál Koreia (KOICA), tanba nia partisipasaun no kooperasaun ne’ebé kontribui ba dezenvolvimentu iha Timor-Leste.
Loron Finadu, ne’ebé komemora iha loron 2 Novembru, mak loron atu hanoin no reza ba família, belun no ema hotu ne’ebé mate ona.
Iha Timor-Leste, Loron Finadu iha importánsia boot ba kultura no tradisaun, tanba família sira halibur hamutuk atu vizita rate, lori ai-funan, hamoos rate no halo orasaun ba matebian sira.
Prátika ne’e hatudu respeitu, domin no ligasaun espirituál entre família sira ho sira-nia matebian.
Loron Finadu mós sai hanesan oportunidade atu hametin solidariedade, unidade no dame iha komunidade, liuliu liuhusi partisipasaun juventude no família sira.
(eme)
