DÍLI, STLTIMORLESTE.com – Komando Polísia Nasional Timor-Leste (PNTL) Munisipiu Dili garante seguransa durante loron finadu, 1 no 2 Novembru 2026, hodi prevene konflitu no mantein orden públika.
Komandante PNTL Munisipiu Dili, Komisáriu Asistente Polísia Orlando Gomes, afirma katak operasaun seguransa durante loron rua ne’e lao ho di’ak.
Nia hatete katak, komunidade bele vizita semitériu, hamos rate, kari ai-funan no sunu lilin ho situasaun hakmatek.
“Ita koloka membru Polísia iha semitériu hotu, postu no fatin risku sira. Ita aumenta patrullamentu durante loron no kalan,” deklara Orlando Gomes.
Nia hato’o deklarasaun ne’e ba jornalista sira iha Eskadra Dom Alexu Aimutin, Dili, kuarta-feira (04/11/2026).
Orlando Gomes esplika katak, Komando PNTL Munisipiu Dili hetan reforçu husi Komando Jerál PNTL no apoiu unidade seguransa sira.
Unidade sira ne’ebé partisipa inklui Sentru Formasaun Polísia (SFP), Unidade Polísia Marítima (UPM), Unidade Espesiál Polísia (UEP) no F-FDTL.
“Ita hala’o operasaun konjunta atu garante seguransa adekuada ba komunidade sira iha semitériu hotu,” nia hateten.
Nia hatutan katak, operasaun ne’e objetivu prinsipál mak prevene konflitu, garante orden públika no kontrola movimentu komunidade iha fatin risku.
Tuir nia, kordenasaun ho Konsellu Polísia Komunitária (KPK) no ofisiál polísia suku sira mós importante tebes.
“Ita halo enkontru no parada ofisiál ho polísia suku sira atu hametin seguransa iha semitériu no apoia komunidade,” nia deklara.
Orlando Gomes apresia apoiu no kontribuisaun juventude no komunidade sira, ne’ebé koopera ho PNTL durante operasaun.
“Durante loron 1 to’o 2, situasaun iha kapital Dili lao hakmatek, laiha konflitu ka perturbasaun orden públika,” nia afirma.
Akademista Universidade Nasionál Timor Lorosa’e (UNTL), José Costantino Ximenes, mós afirma katak situasaun seguransa iha Dili durante loron finadu lao hakmatek.
Nia observa katak, komunidade sira hala’o atividade limpeza rate, kari ai-funan no sunu lilin sem enfrenta konflitu.
“Situasaun jerál iha semitériu no kapital Dili hakmatek. Polísia garante seguransa iha semitériu sira,” nia hateten.
José Costantino Ximenes hato’o apresiasaun ba PNTL tanba esforsu ne’ebé hala’o hodi garante seguransa komunidade durante loron finadu.
(jen)
