DILI, STLTIMORLESTE.com – Primeiru-Ministru (PM), Kay Rala Xanana Gusmão kritika grupu arte marsiais sira ne’ebé uza arte marsiais atu halo asaltu no violénsia.
Xanana Gusmão hato’o deklarasaun ne’e ba jornalista, hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairro Pité, Dili, Kuarta-feira, 4 Novembru 2026.
Primeiru-Ministru hatete katak, Governu deside atu taka grupu arte marsiál sira tanba membru balu la uza arte marsiál tuir nia objetivu orijinál.
Nia esplika katak, arte marsiál tenke sai hanesan meiu atu treina disiplinu, abilidade no respeitu, la’ós atu asalta malu ka estraga propriedade ema nian.
“Arte marsiál mak treinu atu dezenvolve abilidade no disiplinu, la’ós atu oho malu ka estraga ema nia sasán,” Xanana Gusmão dehan.
Nia hatete katak, Líder GAM hasoru difikuldade atu kontrola grupu sira, tanba lideransa balu la konsege kontrola membru hotu.
Xanana mós manifesta preokupasaun kona-ba grupu balu ne’ebé uza símbolu no bandeira nasaun seluk, inklui bandeira Indonézia.
Primeiru-Ministru hatete katak, konflitu entre membru grupu sira dala barak hamosu problema iha família no komunidade, maski sira iha relasaun família.
Nia mós refere ba insidente asaltu ne’ebé akontese iha Beto, ne’ebé envolve membru grupu arte marsiál, no husu atu komprende fali objetivu arte marsiál nian.
Xanana afirma katak, Líder GAM presiza kontrola atividade grupu sira atu prevene violénsia no mantein seguransa públika.
Iha parte seluk, jornalista husu kona-ba deklarasaun Vise-Primeiru-Ministru Mariano Assanami Sabino, ne’ebé deklara katak grupu arte marsiál sira la’ós afiliadu ba Indonézia la Jura ba Bandeira Merah putih.
Xanana hatete katak, nia rona informasaun kona-ba membru grupu balu ne’ebé ba Indonézia atu hasae nivel ka kategoria, maibé nia la iha informasaun kompletu.
“Ha’u rona katak sira ba hasae nivel iha Indonézia, maibé se informasaun ne’e la loos, entaun ha’u mak sala,” Xanana dehan.
Aleinde ne’e, jornalista mós husu kona-ba prosesu nomeasaun Ministru Ensinu Superior foun atu troka Ministru Onório, ne’ebé mate ona.
Xanana hatete katak, Governu atual mak governu koligasaun, no Partidu Demokrátiku (PD) mak tenke propoin kandidatu atu troka kargu ne’e.
Nia esplika katak, Primeiru-Ministru labele hili mesak kandidatu ne’e, tanba tenke respeita akordu polítiku iha koligasaun governativa.
“Ha’u labele obriga, tanba agora Vise-Primeiru-Ministru Mariano Assanami Sabino mak kaer kargu interinu,” Xanana dehan.
(eme)
