ZUMALAI, STLTIMORLESTE.com – Eskola Sekundária Jerál 5 de Maio Becora seidauk iha biblioteka, tanba ne’e, eskola asegura livru sira iha sala profesór nian atu evita livru sira lakon ka estraga.
Adjuntu Diretór Eskola Sekundária Jerál 5 de Maio Becora, Lobato Mota Pereira hato’o informasaun ne’e ba STL Kuarta (04/11/2026).
Nia esplika katak, eskola ne’e iha livru ba estudante husi klase 10 to’o 12, maibé seidauk iha espasu adekuadu atu rai livru sira. Tanba ne’e, eskola tenke rai no asegura livru hirak ne’e iha sala profesór sira-nian.
“Ami-nia livru menus hotu husi klase 10 to’o 12. Problema espasu atu rai livru sira ne’e seidauk rezolve. Ami fiar katak, edifísiu foun ne’e iha tinan oin bele remata, atu nune’e ami bele tau livru sira iha fatin ne’ebé apropriadu. Ba klase 12, livru iha ba disiplina hotu, inklui livru Istória, Literatura, Ekonomia, Fízika, Biolojia, Jeolojia, Kímika, Sosiolojia no Jeografia ba klase 10,” nia afirma.
Nia hatutan katak, livru ba klase 11 mós iha, maibé tanba seidauk iha biblioteka, eskola tenke asegura livru sira iha sala profesór sira-nian atu mantein sira-nia kondisaun.
Iha parte seluk, Diretór EBC Manleuana, Carlos Correia, dehan katak eskola ne’e asegura livru sira ho di’ak iha biblioteka, hodi fasilita estudante sira atu empresta no lori ba uma atu estuda.
“Ami-nia biblioteka iha, no livru hirak ne’e ami asegura ho di’ak iha biblioteka. Estudante sira bele foti livru, rejista sira-nia naran no lori ba uma, depois lori fila fali ba eskola. Prazu empresta semana ida. Se lae, estudante sira bele uza livru ne’e atu estuda iha sala aula de’it,” nia hateten.
Carlos hatutan katak, estudante sira ne’ebé empresta livru tenke entrega fila fali ba eskola depois semana ida. Livru ba disiplina hotu disponivel iha biblioteka no eskola kontinua asegura sira ho di’ak.
Enkuantu ne’e, funsionáriu biblioteka iha Eskola Sekundária Jerál FINANTIL, Adilson Viegas Espirito Santos, dehan katak estudante sira bele empresta livru ida durante loron tolu, no tenke entrega fila fali ba eskola bainhira prazu ne’e remata.
Nia esplika katak, espasu biblioteka ne’e seidauk sufisiente atu atende estudante sira, tanba kada loron biblioteka simu estudante hamutuk 30. Tanba ne’e, presiza espasu ne’ebé luan no adekuadu atu fasilita estudante sira asesu ba livru.
Nia husu mós ba entidade edukasaun relevante atu fó atensaun ba nesesidade espasu biblioteka, hodi bele hadi’a kondisaun no aumenta kapasidade atendimentu ba estudante sira.
Iha parte seluk, Diretór Nasionál Ensinu Sekundáriu iha Ministériu Edukasaun, Benjamin Gomes da Cruz Fernandes, dehan katak eskola sira presiza kontinua asegura livru ne’ebé iha, hodi garante katak estudante sira bele asesu ba livru no uza sira atu apoia prosesu aprendizajen.
Nia enfatiza katak, depois estudante sira uza livru, eskola tenke rai fila fali ho di’ak iha biblioteka, atu nune’e estudante seluk mós bele asesu ba livru hirak ne’e.
(jac)
