ZUMALAI, STLTIMORLESTE.com – Komunidade sira iha Suku Zulo, Aldeia Lale, Postu Administrativu Zumalai, Munisípiu Covalima, preokupa ho kondisaun estrada ne’ebé liga Zulo Knua ba Vila Zumalai, tanba estrada refere hahú monu no ameasa atu kotu.
Marito Barros, nu’udar komunidade husi Suku Zulo, Aldeia Lale, dehan katak kondisaun estrada husi Zulo Knua ba Vila Zumalai sai aat ona, tanba parte balun hosi estrada asfaltada hahú monu. Situasaun ne’e obriga transporte públiku no privadu ne’ebé uza estrada refere atu halo viajen ho kuidadu, liuliu iha tempu kalan.
“Estrada iha parte letra S nian, sorin ida monu ona, no sorin seluk de’it mak sei di’ak. Bainhira ita sa’e ba leten no haree ba kraik, kondisaun hanesan mós, sorin ida monu ona. Transporte sira bele kontinua halo viajen, maibé bainhira udan, hau hanoin estrada ne’e ameasa atu kotu, tanba rai sai mamar,” Marito hato’o ba STL, Kuarta-feira (04/11/2026).
Tuir Marito, alende parte estrada ne’ebé monu, estrada balun mós nakonu ho fatuk ki’ik no iha kuak, ne’ebé difikulta komunidade sira bainhira uza transporte atu halo viajen ba Vila Zumalai.
“Kondisaun estrada husi Zulo Knua ba Zumalai hahú aat ona. Parte balun ameasa atu kotu, no parte seluk nakonu ho fatuk ki’ik no iha kuak. Situasaun ne’e difikulta ami ne’ebé uza transporte atu halo viajen ba Vila Zumalai,” nia afirma.
Nia kontinua hateten katak, estrada iha parte besik Zulo Knua, iha área Leogol, uluk kotu ona, maibé agora halo aterru tiha ona. Maski nune’e, bainhira udan boot, transporte sira kontinua hasoru difikuldade atu liu iha estrada refere. Nia mós temi katak estrada ne’e kotu iha fulan balun liubá, bainhira udan la para.
Enkuantu Maria de Jesus, nu’udar komunidade, mós hato’o preokupasaun hanesan kona-ba kondisaun estrada ne’ebé hahú aat, ho parte balun monu ona. Nia dehan katak kondisaun ne’e obriga kareta no motorizada sira atu lori an neneik bainhira liu iha área refere, liuliu iha tempu kalan.
“Kondisaun estrada ita nian aat ona, parte balun monu no sorin ida de’it mak di’ak. Iha fatin ne’e, kareta no motorizada tenke lao neneik, liuliu bainhira halo viajen iha tempu kalan. Tanba ne’e, tenke lori an ho kuidadu,” nia esplika.
Bazeia ba observasaun STL, kondisaun estrada ne’ebé liga Zulo Knua ba Vila Zumalai hahú aat ona, ho parte balun monu, nakonu ho fatuk no iha kuak, ne’ebé bele hamosu difikuldade ba transporte públiku no privadu ne’ebé uza dalan refere.
(jac)
