DÍLI, STLTIMORLESTE.com – Projetu estrada ne’ebé Governu finansia ho orsamentu boot kontinua hamosu preokupasaun, tanba osan barak sai ba rai-liur, enkuantu negosiante lokál sira seidauk sente benefísiu ekonomia.
Governu aloka orsamentu boot ba konstrusaun estrada no ponte, maibé gastu projetu sira-ne’e la hotu sirkula iha rai-laran atu ajuda dezenvolve atividade ekonomia lokál.
Projetu infraestrutura boot sira barak entrega ba kompañia estranjeira, ne’ebé lori materiál konstrusaun husi rai-liur no emprega mós traballadór estranjeiru.
Kondisaun ne’e halo parte husi osan projetu sai fila ba rai-liur, liuhusi pagamentu materiál, lukru kompañia no transferénsia saláriu traballadór estranjeiru ba sira-nia nasaun.
Negosiante lokál sira enfrenta difikuldade atu hetan benefísiu husi projetu infraestrutura, maski atividade konstrusaun kontinua hala’o iha Timor-Leste ho finansiamentu husi Orsamentu Jerál Estadu (OJE).
Situasaun ne’e hamosu kestaun kona-ba oportunidade ba empreza lokál, atu fornese materiál no partisipa iha projetu sira ne’ebé Governu finansia.
Negosiante materiál konstrusaun lokál, Jose da Silva, lamenta katak projetu estrada sira la fó benefísiu ekonomia ne’ebé natoon ba negosiante rai-laran, tanba kompañia sira prefere sosa materiál husi rai-liur.
“Ita haree estrada di’ak, maibé osan la tama mai ami-nia bolsu. Kompañia sira sosa materiál husi liur, no traballadór sira haruka osan ba sira-nia rai,” nia dehan ba STL, iha Dili, Kinta (05/11/2026).
Negosiante ne’e hatutan katak Governu presiza estabelese regra ne’ebé bele proteje no fó oportunidade ba negosiante lokál, atu sira bele partisipa iha fornecimentu materiál ba projetu infraestrutura.
“Governu tenke proteje negosiante lokál. Se osan projetu boot sira kontinua sai ba liur, ami sei susar atu dezenvolve negósiu iha ami-nia rai rasik,” nia hatutan.
Iha parte seluk, observadór ekonomia, Silvino Morais da Costa, konsidera katak dominasaun kompañia estranjeira iha projetu infraestrutura, bele limita oportunidade ba empreza lokál no halo osan Estadu nian kontinua sai ba rai-liur.
Nia konsidera katak, Governu tenke fó prioridade ba utilizasaun materiál lokál no empregu ba traballadór Timor-oan iha projetu públiku sira, atu osan Estadu nian bele kontribui diretamente ba dezenvolvimentu ekonomia rai-laran.
“Osan Estadu nian tenke fó benefísiu ba povu rasik. Kompañia sira tenke uza materiál lokál no emprega Timor-oan, atu ekonomia rai-laran bele dezenvolve,” nia dehan.
Silvino salienta katak, Governu tenke asegura investimentu ba konstrusaun estrada la benefisia de’it kompañia estranjeira sira, maibé mós fó oportunidade ba negósiu lokál no traballadór Timor-oan atu hetan benefísiu ekonomia.
(car)
