DÍLI, STLTIMORLESTE.com – Prezidente Repúblika (PR), José Ramos-Horta to’o ona iha Korea Súul hodi hala’o vizita estadu no hametin relasaun bilateral entre nasaun rua.
Tuir informasaun ne’ebé STL asesu iha Kinta (05/11/2026), Prezidente Repúblika José Ramos-Horta hamutuk ho delegasaun ofisiál to’o iha Aeroportu Internasionál Incheon, liuhusi aviaun komersiál Korean Air.
Iha aeroportu, Embaixadór Timor-Leste ba Korea Súul, António de Sá Benevides, simu Prezidente Repúblika ho delegasaun. Serimónia simu ofisiál inklui onra militár.
Parte Korea Súul reprezenta hosi Ministru Kim Yong Sun, Diretór-Jerál ba Assuntu ASEAN, Kwon Jae-Hwan, no Embaixadór Korea Súul iha Timor-Leste, Chang Ha Yeong.
Serimónia kontinua ho entrega ai-funan no lia-benvindu hosi estudante sira eskola Chadwick International School. Hafoin ne’e, Prezidente no delegasaun kontinua viajen ba Seul.
Tuir agenda ofisiál, Prezidente Ramos-Horta sei fó onra ba erói nasionál Korea Súul iha Semitériu Nasionál Seul, nu’udar parte husi atividade vizita estadu.
Hafoin serimónia ne’e, Prezidente sei ba Palásiu Prezidensiál hodi hala’o enkontru bilateral ho Prezidente Korea Súul, Lee Jae-myung.
Programa vizita estadu ne’e sei inklui mós vizita ba Assembleia Nasionál Korea Súul no atividade ofisiál seluk, tuir agenda ne’ebé prepara ona.
(eme)
