DILI, STLTIMORLESTE.com – Jesus konvida fiéis sira atu tau Maromak iha fatin dahuluk no hadomi família no maun-alin sira ho domin, pasiénsia no sakrifísiu.
Hanorin ne’e hato’o husi Pe. Paul Kerans, SVD, liuhusi nia refleksaun kona-ba Evanjellu tuir Lucas 14:25-33, ne’ebé STL asesu iha Kinta-feira, 5 Novembru 2026.
Iha Evanjellu ne’e, Jesus dehan katak ema ne’ebé tuir Nia tenke husik buat hotu, inklui nia aman, inan, feen no oan.
Pe. Paul esplika katak, Jesus la husu ema atu odi família, maibé atu hadomi Maromak liu buat hotu, hodi tau relasaun hotu-hotu iha fatin loos.
Nia hateten katak, dala barak ema tau família, servisu, responsabilidade, osan no reputasaun iha prioridade, enkuantu fó tempu no atensaun menus ba Maromak.
Tanba ne’e, Jesus konvida fiéis sira atu muda prioridade moris, hodi tau Kristu iha fatin dahuluk no hadomi família ho laran-metin, pasiénsia no sakrifísiu.
Iha nia refleksaun, Pe. Paul mós esplika ai-knanoik rua ne’ebé Jesus uza atu hanorin kona-ba kustu atu sai dixípulu.
Ai-knanoik dahuluk kona-ba ema ida ne’ebé hakarak harii torre, maibé tenke tuur uluk atu sura kustu, hodi asegura katak nia bele remata konstrusaun.
Refleksaun ne’e hanorin katak ema la bele hahú de’it buat di’ak, maibé presiza perseveransa no laran-metin atu remata responsabilidade ne’ebé nia hahú.
Ai-knanoik daruak kona-ba liurai ida ne’ebé tenke deside se nia bele hasoru inimigu ho forsa militár ne’ebé boot liu duké nia.
Husi ai-knanoik ne’e, Pe. Paul konvida fiéis sira atu la enfrenta problema moris nian ho sira-nia forsa rasik de’it, maibé buka Maromak nia matenek no grasa.
Nia mós husu fiéis sira atu rezá molok halo desizaun no rona Maromak molok foti asaun, hodi supera hirus, orgullu, fraqueza, tentasaun, ta’uk no kanek iha moris.
“Antes ita halo funu, ita tenke halo orasaun; antes halo desizaun, ita tenke rona.”
Pe. Paul enfatiza katak sai dixípulu presiza matenek, orasaun no konfiansa ba Maromak, tanba ema labele manán dezafiu hotu-hotu ho nia forsa rasik.
Nia konvida fiéis sira atu tuur hamutuk ho Jesus, rona Nia liafuan, buka Nia matenek no husik Maromak nia grasa sai kbiit iha sira-nia moris.
(eme)
