DÍLI, STLTIMORLESTE.com – Kapital Xina boot ne’ebé tama iha merkadu Timor-Leste halo negosiante lokál susar atu dezenvolve sira-nia negósiu, no hamosu preokupasaun kona-ba soberania ekonómika.
Prezensa negósiu estranjeiru, liuliu husi Xina, iha área urbana no rurál kontinua sai kestaun, tanba atividade negósiu hirak-ne’e tama iha setór oioin, husi kioos ki’ik to’o konstrusaun.
Kapital boot ne’ebé emprezáriu estranjeiru sira iha permite sira atu hala’o atividade negósiu ho kapasidade finanseira aas, enkuantu negosiante lokál barak enfrenta limitasaun kapital atu dezenvolve sira-nia atividade.
Kondisaun ne’e hamosu preokupasaun kona-ba futuru negósiu lokál, liuliu oportunidade ba Timor-oan atu kompete iha merkadu nasionál ne’ebé kontinua simu investimentu estranjeiru.
Aleinde kestaun negósiu, atividade jogu online ilégál mós sai preokupasaun, tanba bele loke dalan ba krime organizadu, lavagem osan no tráfiku umanu, ne’ebé ameasa estabilidade sosiál.
Situasaun ne’e hamosu kestionamentu kona-ba fiskalizasaun Governu nian, liuliu iha kontrolu lisensa, atividade negósiu estranjeiru no medida protesaun ba emprezáriu lokál atu bele kompete iha merkadu.
Akademista Universidade Nasionál Timor Lorosa’e (UNTL), Domingos de Carvalho, observa katak kapital estranjeiru, liuliu husi Xina, domina ona parte merkadu lokál, husi kioosku to’o setór konstrusaun.
“Kapital estranjeiru ne’ebé boot halo emprezáriu lokál susar atu kompete. Se Governu la regula didi’ak, ita bele lakon kontrolu ba ita-nia ekonomia rasik,” dehan Domingos ba STL, iha Kaikoli, Dili, Kinta (05/11/2026).
Nia konsidera katak, dominasaun negósiu estranjeiru bele limita oportunidade ba emprezáriu Timor-oan, liuliu sira ne’ebé iha kapital ki’ik no depende ba atividade komérsiu atu sustenta família.
“Investimentu estranjeiru importante, maibé Governu tenke proteje negósiu lokál. Labele husik kapital boot domina merkadu tomak no taka oportunidade ba Timor-oan,” nia hatutan.
Domingos mós alerta kona-ba atividade jogu online ilégál ne’ebé bele hamosu problema sosiál, liuliu ba juventude, no aumenta risku atividade kriminál iha rai-laran.
“Jogu online ilégál bele sai dalan ba krime organizadu no estraga futuru juventude. Governu tenke deteta no hapara atividade hirak-ne’e molok sai problema boot,” nia subliña.
Nia husu Governu atu reforsa koordenasaun entre Polísia Nasionál Timor-Leste (PNTL), Servisu Migrasaun no instituisaun relevante sira, hodi fiskaliza dokumentu, lisensa no atividade negósiu estranjeiru.
Nia mós defende revizaun ba lei investimentu atu fó prioridade ba emprezáriu lokál iha setór mikroekonómiku, no husu transparénsia kona-ba rezultadu investigasaun ba atividade negósiu ne’ebé deskonfia viola lei.
Iha parte seluk, observadór polítika, Daniel da Conceição, konsidera katak Governu labele taka matan ba dominasaun kapital estranjeiru, tanba soberania nasionál la’ós de’it kona-ba fronteira, maibé mós kontrolu ekonómiku.
“Se Estadu kontinua halo mamar perante dominasaun kapital estranjeiru ne’ebé la tuir regulamentu, Timor-Leste bele monu ba kolonizasaun foun iha sentidu ekonómiku,” dehan Daniel.
Nia salienta katak, autoridade sira presiza hatudu vontade polítika atu defende interese nasionál, liuliu protesaun ba negosiante ki’ik ne’ebé enfrenta kompetisaun ho empreza estranjeira ho kapital boot.
“Autoridade tenke iha vontade polítika metin atu tau uluk interese nasionál, la’ós interese grupu ka investimentu ne’ebé bele lori dezastre ba futuru nasaun,” nia hatutan.
Daniel konsidera katak, Timor-Leste presiza investimentu estranjeiru ne’ebé respeita lei, kria oportunidade empregu ba Timor-oan no kontribui ba dezenvolvimentu sustentável, la’ós investimentu ne’ebé prejudika ekonomia no estabilidade sosiál.
(car)
