DILI, STLTIMORLESTE.com – IX Governu Konstitusionál liuhusi Ministériu Juventude, Desportu, Arte no Kultura (MJDAK), hili tema nasional ba selebrasaun Loron Nasional Juventude ba dala 21 no komemorasaun aniversáriu ba dala 35 Massacre Santa Cruz, ho objetivu hametin espírito nasionalizmu no kontribuisaun juventude ba dezenvolvimentu sustentável.
Tema ne’ebé hili mak “Ho Esperitu 12 de Novembru Nian Lori Ita Hamutuk ba Hari Paz no Sai Autor ba Dezenvolvimentu ne’ebé Sustentável”.
Selebrasaun ne’e iha subtema rua. Primeiru, “Valoriza Sakrifísiu Loriku Aswain Sira Nian 12 de Novembru ho Hametin Identidade liuhusi Istória, Asaun Ativu no Kreatividade hodi Hakat ba Futuru”.
Segundu, “Hanoin Hikas Fali Juventude Loriku Aswain nia Sakrifísiu 12 de Novembru hodi Fó Forsa ba Juventude Atu Promete Halo Mudansa iha Sira Ida-idak nia Moris ba Futuru”.
Diretór Nasionál ba Dezenvolvimentu Juventude, João Lemos hateten, ida-ne’e ba jornalista STL, Kuarta-feira (04/11/2026), iha edifísiu MJDAC, Díli.
João Lemos esplika katak, selebrasaun importante rua ne’e sei hala’o iha fatin diferente. Komemorasaun Massacre Santa Cruz sei hala’o iha Díli, enkuantu Loron Nasional Juventude tinan ne sei selebra iha munisípiu Manatuto no Postu Administrativo sira iha territóriu nasional.
Nia hateten katak, planu ne’e atu lori selebrasaun Loron Nasional Juventude ba munisípiu ida-idak, tuir turnu kada tinan. Tinan kotuk selebrasaun hala’o iha Munisípiu Aileu, enkuantu tinan ida-ne’e sei hala’o iha Munisípiu Manatuto.
Tuir João Lemos, atividade prinsipál sira sei inklui semináriu kona-ba istória, situasaun pasadu no realidade atual, liuliu kona-ba adezaun Timor-Leste ba ASEAN, nune’e mos asuntu importante seluk ne’ebé iha ligasaun ho juventude.
Nia enfatiza katak, komemorasaun ne’e la’ós de’it atu hanoin fali memória luta no sakrifísiu juventude sira nian iha 12 Novembru, maibé mós atu inspira jerasaun foun hodi hametin espírito nasionalizmu.
“Liuhusi sira-nia terus no luta, ita presiza fanun juventude atu hatudu espírito nasionalizmu, kuidadu nasaun no rai, no buka oportunidade oioin atu promove sira-nia talentu no kapasidade,” João Lemos afirma.
Nia kontinua katak, juventude tenke aproveita oportunidade atu dezenvolve abilidade no kreatividade, hodi bele kompete iha era atual no sai parte importante iha prosesu dezenvolvimentu nasaun.
João Lemos mós konsidera katak, atividade sira ne’ebé hala’o iha territóriu Timor-Leste tomak sei ajuda juventude komprende ho di’ak importánsia Loron Nasional Juventude no komemorasaun Massacre Santa Cruz, hanesan parte importante husi istória luta no independénsia Timor-Leste.
(leo)
