DÍLI, STLTIMORLESTE.com – Feto Timor-Leste hatudu ona kourajen iha luta libertasaun nasionál no kontinua kontribui ba dezenvolvimentu nasaun, igualdade jéneru no inkluzaun sosial.
Iha tempu rezisténsia, feto sira partisipa hamutuk ho mane sira, inklui iha atividade klandestina no luta armada, hodi kontribui ba libertasaun Timor-Leste.
Depois ukun rasik-an, feto sira kontinua partisipa iha área edukasaun, ekonomia, lideransa no dezenvolvimentu nasionál, ho objetivu atu atinje igualdade no inkluzaun.
Feto potensial Aquelina Imaculada Pereira, ne’ebé koñesidu ho naran Nina Peregrina, hatudu ezemplu ida kona-ba luta no kontribuisaun feto Timoroan ba nasaun.
Tuir mensajen ne’ebé Prezidénsia Repúblika fahe iha loron 5 fulan Novembru 2026, Nina sai figura inspiradora iha selebrasaun Loron Nasionál Feto Timor-Leste ba dala 50, ho tema “Feto Timor-Leste Tinan 50: Igualdade no Inkluzaun”.
Selebrasaun ne’e lori lema “Ami Feto Timor-Leste La Rende, Sei Luta Nafatin To’o Atinje Igualdade no Inkluzaun”.
Nina moris no boot iha ai-laran to’o tinan 11. Depois, nia fila ba vila atu kontinua estudu, maibé nafatin mantein ligasaun ho komunidade iha ai-laran.
Bainhira joven, nina partisipa iha movimentu klandestina nu’udar estafeta direta, hodi lori informasaun entre vila no ai-laran no fó esperansa ba joven sira.
Iha tinan 1995 to’o 1996, bainhira atividade klandestina komesa deskobre, Nina ba ai-laran no integra FALINTIL iha luta ba libertasaun nasionál.
Depois restaurasaun ukun rasik-an, nia kontinua estudu iha eskola sekundária, remata diploma D3 iha Informátika iha Dili, lisensiatura iha Jestaun iha Indonézia no mestradu iha Jestaun iha Portugal.
Nina mós servisu iha Fundasaun Alola no Médicos do Mundo Portugal. Nia asumi kargu Sekretária-Jerál iha Organizasaun Rezisténsia Sagrada Família no Vice-Presidente Dahuluk iha CUOFCC-TL.
Iha tinan 2022, durante mandatu daruak Prezidente José Ramos-Horta, Nina asumi knaar Koordenadora ba Servisu Sosiedade Sivíl no Asuntu Sosiál iha Prezidénsia Repúblika.
Depois, nia sai Téknika Espesializada iha Gabinete Xefe Casa Sivil, hodi apoia Asesór Prinsipál, Tenente-Jeneral reformadu Lere Anan Timur.
Nia responsabilidade inklui prepara planu asaun, proposta programa, nota informativa no relatóriu atividade ba Prezidente no Xefe Casa Sivil.
Nina mós organiza semináriu kona-ba istória luta libertasaun nasionál iha universidade sira no fasilita diálogu komunitáriu kona-ba prevensaun konflitu no rekonsiliasaun.
Nia konsidera investimentu ba feto nu’udar aspetu importante, tanba feto iha papél estratéjiku iha família, ekonomia no edukasaun.
Nina nia esperiénsia hatudu katak obstákulu bele sai oportunidade atu aprende, dezenvolve kapasidade no kontinua kontribui ba nasaun.
Husi luta iha ai-laran to’o servisu iha Prezidénsia Repúblika, nia istória hatudu partisipasaun feto iha libertasaun no dezenvolvimentu Timor-Leste.
Nia trajetória reflete mensajen katak luta ba igualdade no inkluzaun presiza estudu, servisu no partisipasaun kontinua husi feto no mane hotu.
(eme)
