BAUCAU, STLTIMORLESTE.com – Diretor Eskola Ensinu Baziku Central (EBC) 3 Siklu Wailili, Marcelino Diego Marques, husu atu reforsa edukasaun karakter ba estudante sira, tanba karakter no etika ne’ebé menus bele afeta kualidade edukasaun iha eskola.
Lia hirak ne’e hato’o husi Diretor Eskola EBC 3 Siklu Wailili, Marcelino Diego Marques, ba STL iha Eskola Wailili, Sesta (6/11/2026).
Nia esplika katak, edukasaun karakter importante tebes atu forma labarik sira nia hahalok, tanba iha tempu atual, ema barak defende labarik nia direitu, maibé dala barak labarik rasik seidauk komprende didi’ak kona-ba sira nia direitu no responsabilidade.
Nia dehan, nasaun ukun-an tinan 20 resin ona, maibé implementasaun regulamentu presiza adapta ho situasaun no realidade ne’ebé akontese iha sosiedade.
Nia mós lamenta katak, estudante balun la hatudu hahalok ne’ebé respeita profesor, hanesan la hatene hato’o kumprimentu, la husu lisensa no la tuir regra iha eskola. Situasaun ne’e, tuir nia, liga mós ho edukasaun iha família.
“Estudante balun iha vontade atu estuda, maibé balun seluk halo profesor sira ulun moras, tanba la hakarak aprende no la tuir orientasaun husi profesor,” nia dehan.
Diretor ne’e subliña katak, situasaun agora diferente ho tempu uluk, tanba estudante balun lakon ona respeitu ba profesor, ne’ebé sai dezafiu boot ba prosesu hanorin no aprende.
Nia haktuir katak, menus etika no moral iha estudante sira, inklui lafiar ba orientasaun profesor, sai hanesan obstákulu ida ne’ebé bele hamenus kualidade edukasaun.
Tanba ne’e, nia konsidera katak, atu hadi’a kualidade edukasaun, presiza hahú husi hadi’a karakter estudante sira, la’ós de’it ko’alia no fó avizu loroloron, maibé presiza mekanizmu edukasaun ne’ebé bele muda estudante sira nia hahalok.
Nia mós temi katak, profesor sira agora hasoru limitasaun iha dixiplina estudante, tanba iha regra ne’ebé bandu baku, tuku ka hirus estudante ho maneira ne’ebé bele konsidera hanesan tratamentu aat.
Nia fó ezemplu, bainhira profesor fó tarefa uma (TPC) ba estudante atu halo, maibé aban estudante mai eskola la halo, profesor tenke buka dalan seluk atu eduka no fó komprensaun, la’ós uza violénsia.
“Agora ita tenke lao tuir lei no regulamentu ne’ebé iha, labele baku ka maltrata estudante. Maibé, ita presiza buka dalan atu hadi’a sira nia karakter no responsabilidade,” nia afirma.
Nia husu atu família no eskola hamutuk fó atensaun ba edukasaun karakter, hodi forma estudante sira ne’ebé iha disiplinu, responsabilidade no respeitu ba ema seluk.
(joa)
