DÍLI, STLTIMORLESTE.com – Asian Football Confederation (AFC) kontinua hala’o kompetisaun futeból ba nivel klubu iha Ázia ba époka 2026/2027, ho partisipasaun husi klubu sira ne’ebé mai hosi nasaun membru AFC.
Ba époka ida-ne’e, AFC organiza kompetisaun prinsipál ba klubu mane iha nivel kontinental, inklui AFC Champions League Elite, AFC Champions League Two no AFC Challenge League.
Kompetisaun sira-ne’e iha objetivu atu hametin kualidade futeból iha Ázia, fó oportunidade ba klubu sira atu kompeti iha nivel internasionál no hasa’e dezenvolvimentu futeból profisionál
Tuir dokumentu alokasaun vaga AFC ba época 2026/2027, Timor-Leste la hetan vaga ba AFC Champions League Elite no AFC Champions League Two.
Timor-Leste hetan de’it vaga ida ba AFC Challenge League, ne’ebé mak kompetisaun nivel datoluk ba klubu mane iha Ázia.
Situasaun ida-ne’e liga ho sistema klasifikasaun no alokasaun vaga AFC ba federasaun futeból kada nasaun, ne’ebé konsidera rezultadu klubu sira iha kompetisaun kontinental no rekizitu lisensiamentu klubu.
Karketu Dili reprezenta Timor-Leste
Maski Timor-Leste laiha reprezentante iha Champions League Elite no Champions League Two, Karketu Dili hetan lisensiamentu atu reprezenta nasaun iha AFC Challenge League 2026/2027.
Maibé, Karketu Dili la konsege avansa ba fase grupu, depois derrota 1-2 kontra Kasuka FC hosi Brunei Darussalam, iha jogu eliminatória ne’ebé hala’o iha 15 Setembru 2026, iha Estádio Hassanal Bolkiah.
Rezultadu ne’e halo Karketu Dili nia viajen iha kompetisaun Challenge League remata iha faze preliminár.
(leo)
