DILI, STLTIMORLESTE.com – Prezidente Repúblika (PR), Ramos-Horta kondekora voluntáriu Koreanu no líder relijiozu na’in ualu tanba kontribuisaun ba Timor-Leste.
Prezidente Repúblika no Laureadu Nobel ba Pás, José Ramos-Horta, entrega kondekorasaun Ordem de Timor-Leste ba voluntáriu Koreanu no líder relijiozu sira. Serimónia kondekorasaun ne’e hala’o iha Embaixada Timor-Leste iha Seoul, Repúblika Koreia, nu’udar rekoñesimentu ba sira-nia kontribuisaun ba dezenvolvimentu nasionál.
Ordem de Timor-Leste mak kondekorasaun aas liu Estadu nian, ne’ebé fó ba indivíduu sira ho servisu esepsionál ba nasaun, povu Timor-Leste no umanidade.
Tuir Dekretu Prezidente Repúblika Nú. 133/2026, Prezidente Ramos-Horta atribui kondekorasaun iha grau Medalla no Insígnia ba benefisiáriu na’in ualu.
Resipiente Grau Medalla:l Anselmo S.H. Lee, Embaixadór ba Direitus Umanus, Pás no Demokrasia Repúblika Koreia nian. Resipiente Grau Insígnia ba Song Jae-Joong, Rev. Kristianus Piatu, SVD. Rev. Martinus Quido Naikofi, SVD. Mafalda dos Santos, SSpS. Rev. Pe. Jong Du Youn (John). Rev. Pe. Aloysius Louis Sakera, SVD. Rev. Pe. Olivio Da Costa, SDB.
Kondekorasaun ne’e rekoñese sira-nia servisu no dedikasaun durante períodu naruk, liuhusi atividade umanitária, relijioza no dezenvolvimentu iha Timor-Leste.
Prezidente Ramos-Horta afirma katak progresu Timor-Leste nian hetan apoiu importante husi belun internasionál sira, liuhusi servisu no kompromisu iha rai-laran no rai-li’ur.
“Servisu relevante sira ne’ebé presta ona merese hetan rekoñesimentu no valorizasaun husi Estadu.” dehan Prezidente Repúblika liu husi Komunikadu ne’ebé STL asesu Segunda 09/11/2026.
Nia hateten katak kontribuisaun husi voluntáriu no parseiru internasionál sira fó benefísiu ba povu Timor-Leste iha setór dezenvolvimentu oioin.
Prezidente mós hato’o agradesimentu, iha naran Estadu no povu Timor-Leste, ba sira hotu ne’ebé kontinua apoia nasaun nia prosesu dezenvolvimentu.
Kondekorasaun ne’e sai símbolu apresiasaun Estadu nian ba individu sira ne’ebé kontribui ho kompromisu no solidariedade ba Timor-Leste.
(eme)
