DÍLI, STLTIMORLESTE.com – Xefi Suku Comoro, Elijio José da Silva Marçal, apela ba juventude atu rejeita violénsia no promove diálogu hodi hametin dame iha komunidade.
Elijio hato’o apelu ne’e iha entrevista ho jornalista STL iha nia fatin servisu, Suku Comoro, Segunda-feira (09/11/2026).
Nia konsidera juventude nu’udar futuru nasaun, ne’ebé iha responsabilidade importante atu mantein dame no estabilidade iha sosiedade.
Nia dehan katak, ema hotu tenke iha kompromisu atu kria ambiente dame, hahú husi família, komunidade to’o sosiedade tomak.
Bainhira mosu problema ka dezakordu, ema sira tenke rezolve liuhusi komunikasaun no diálogu, la’ós uza forsa ka violénsia.
Tuir Elijio, hahalok violénsia hanesan baku malu, tuda malu no estraga propriedade la’ós solusaun, maibé hamosu konsekuénsia negativu.
Nia hatutan katak, bainhira joven ida envolve iha konflitu no hetan kanek, inan-aman mós sofre tanba situasaun ne’e.
Tanba ne’e, nia enkoraja juventude atu kontrola emosaun, respeita malu no rona opiniaun husi ema seluk, liuliu inan-aman no katuas-ferik.
Nia konsidera katuas-ferik sira iha esperiénsia ne’ebé bele fó orientasaun no konsellu di’ak ba jerasaun foun.
Aleinde ne’e, Elijio apela ba komunidade Suku Comoro atu aproveita tempu ikus tinan 2026 hodi hametin relasaun sosial no evita hahalok ne’ebé bele hamosu konflitu.
Nu’udar autoridade lokál, nia husu komunidade atu hamutuk iha komprensaun no responsabilidade, maski Suku Comoro iha área luan no populasaun barak.
Nia hein katak, liuhusi diálogu no kooperasaun, komunidade Suku Comoro bele kontinua moris iha dame, unidade, amizade no harmonia.
Iha parte seluk, Komandante PNTL Munisipiu Dili, Komisáriu Asistente Polísia Orlando Gomes, informa katak juventude tenke hanoin futuru no evita envolve iha konflitu.
Nia esplika katak, juventude tenke aprende no prepara an atu servisu, hodi kontinua dezenvolve nasaun, la’ós gasta tempu iha konflitu.
“Ami sempre hala’o sosializasaun ba eskola no suku sira atu fó hanoin ba komunidade, liuliu juventude, atu kria dame no pás iha rai ida-ne’e,” nia afirma.
Orlando enfatiza katak, juventude tenke evita envolve an iha konflitu ne’ebé bele hamosu krime, no hametin kultura dame iha sosiedade.
(jen)
