DÍLI, STLTIMORLESTE.com – Estadus Unidus no Governu Timor-Leste inaugura edifísiu eskola foun iha Mota Ulun, Dili, hodi taka ofisialmente misaun Pacific Partnership 2026.
Projetu ne’e envolve Armada Naval Estadus Unidus (U.S. Navy Seabees) no enjenheiru husi Força Defesa Timor-Leste (F-FDTL), ne’ebé hamutuk harii edifísiu eskola ho sala aula rua iha Ensinu Báziku Filial (EBF) Mota Ulun.
Serimónia inaugurasaun ne’e hala’o iha loron 9 Novembru, ho prezensa husi Enkarregadu Negósius Embaixada Estadus Unidus, Bruce Begnell, Diretór-Jerál Pre-Eskolár no Ensinu Báziku, Apolinario Serpa Rosa, Diretór EBF Mota Ulun no reprezentante F-FDTL.
Atividade ne’e inklui korta fitas, diskursu ofisiál, aprezentasaun husi estudante sira, bênsaun eskola nian no inaugurasaun plaka.
Durante konstrusaun, membru Naval Mobile Construction Battalion Five no Amphibious Construction Battalion One servisu hamutuk ho enjenheiru F-FDTL atu harii edifísiu eskola foun.
Enkarregadu Negósius Embaixada Estadus Unidus, Bruce Begnell, dehan projetu ne’e reflete kompromisu komún atu promove edukasaun no oportunidade ba labarik Timor-Leste.
“Ami hein katak sala aula ida-ne’e sei sai nu’udar símbolu permanente ba esperansa, oportunidade no konviksaun komún katak investe iha edukasaun mak investe ba futuru,” haktuir nia liu husi komunikadu imprensa neebe STL simu husi media Embaxiador America, Segunda (08/11/2026).
Begnell afirma katak, koperasaun liuhusi Pacific Partnership reforsa amizade entre Estadus Unidus no Timor-Leste, no promove dezenvolvimentu edukasaun nian.
Pacific Partnership mak misaun asisténsia umanitária no preparasaun ba dezastre multinasionál boot liu iha rejiaun Indo-Pasífiku.
Misaun ne’e hahú hosi resposta militár Estadus Unidus ba tsunami tasi-Índiku iha 2004. Iha edisaun 2026, misaun ne’e envolve forsa armada husi Timor-Leste, Kanada, Alemaña, Nova Zelándia no Estadus Unidus.
Tinan 2026 marka realizasaun ba misaun Pacific Partnership dala ualu iha Timor-Leste.
Durante misaun ne’e, Estadus Unidus lori pesoál médiku na’in-50 resin mai Timor-Leste, ne’ebé fó tratamentu no formasaun ba sidadaun timoroan liu na’in-1,200.
Aleinde servisu saúde, misaun ne’e mós hala’o formasaun kona-ba resposta ba dezastre no reabilita edifísiu eskola ida tan, naran EBF Kasnafar, iha Dili.
(dom)
