DÍLI, STLTIMORLESTE.com – Ajensia TradeInvest ho apoiu Uniaun Europeia ho ITC, organiza formasaun kona-ba aspetu legál tratadu investimentu internasionál.
Diretór Ezekutivu TradeInvest, Duilio Marino Gusmao Araujo da Silva, hatete katak formasaun ne’e importante atu hasa’e kapasidade institusionál, liuliu kona-ba obrigasaun internasionál iha área investimentu.
Formasaun ne’e hetan apoiu tékniku husi Uniaun Europeia, liuhusi International Trade Centre (ITC), ne’ebé lori peritu Professor Janssen Calamita atu fahe koñesimentu no kapasita partisipante sira kona-ba aspetu legál tratadu investimentu.
Nia esplika katak, TradeInvest nu’udar instituisaun responsável ba promosaun investimentu no esportasaun, presiza komprende di’ak obrigasaun internasionál antes Estadu halo akordu espesífiku ho investidór sira.
“Ita presiza kumpri obrigasaun internasionál sira ne’ebé iha, bainhira selebra akordu espesífiku investimentu entre Estadu ho investidór sira,” dehan Duilio ba jornalista iha CDB 10 Timor Plaza, Segunda (09/11/2026).
Nia aumenta katak, formasaun ne’e sei kontribui atu hasa’e koñesimentu no kapasidade funsionáriu TradeInvest, no sei estende sesaun formasaun ba instituisaun relevante sira seluk.
Nia konsidera katak, prosesu integrasaun Timor-Leste ba ASEAN ezije preparasaun institusionál atu kumpri obrigasaun no kompromisu ekonomia internasionál, inklui meta integrasaun ASEAN ba períodu 2026–2030.
Iha eventu nee Xefe Projetu Delegasaun Uniaun Europeia iha Timor-Leste, Seth Van Doorn, manifesta kontentamentu tanba atividade ne’e kontinua prosesu kooperasaun ne’ebé hahú ona ho TradeInvest.
Nia hatete katak, atrasaun investimentu estranjeiru, liuliu investimentu ho kualidade, importante tebes ba dezenvolvimentu ekonómiku no futuru nasaun.
“Atrai investimentu estranjeiru ho kualidade di’ak importante tebes ba futuru nasaun,” afirma Seth Van Doorn.
Seth subliña katak, Timor-Leste presiza investimentu estranjeiru atu dezenvolve rekursu gás iha Tasi-Mane, no mós promove investimentu direta estranjeira iha setór produtivu sira seluk.
Setór hirak ne’e inklui prosesamentu, manufatura, agrikultura, servisu no atividade ekonómika seluk ne’ebé bele kria oportunidade empregu no diversifika ekonomia nasionál.
Nia enfatiza katak, Governu presiza kria ambiente investimentu ne’ebé justu, transparente no previsível, atu aumenta konfiansa investidór estranjeiru sira.
Segundo Seth, ambiente investimentu ne’ebé di’ak bele atrai investidór ho kapasidade atu kontribui ba dezenvolvimentu estruturál no transformasaun ekonomia Timor-Leste.
Nia konvida partisipante hotu atu fó kontribuisaun intelektuál ne’ebé krítiku no konstrutivu, hodi hamutuk harii futuru ekonomia nasionál ne’ebé sustentável no inkluzivu.
(dom)
