DÍLI, STLTIMORLESTE.com – Prezidente Repúblika (PR), José Ramos-Horta reafirma Timor-Leste nia papel estratéjiku nu’udar ponte diplomátika entre CPLP no ASEAN, durante vizita servisu iha Bruxelas, Béljika.
Tuir komunikadu ne’ebé STL asesu Tersa nee (06/11/2026) hatete, iha enkontru ho embaixadór sira hosi Komunidade Nasaun sira Lian Portugés (CPLP) no Asosiasaun Nasaun sira Sudeste Aziátiku (ASEAN), Ramos-Horta destaka Timor-Leste nia pozisaun jeopolítika nu’udar membru CPLP kleur no membru foun ASEAN.
Xefe Estadu subliña katak, parseria entre organizasaun multilaterál rua ne’e sei loke oportunidade foun ba diálogu, análize konjunta no kooperasaun inter-rejionál.
Prezidente mós esplika, preparasaun Timor-Leste nian atu asume Prezidénsia ASEAN iha tinan 2029, liuhosi investimentu ba infraestrutura no hadi’a kapasidade lojístika nasionál.
Investimentu hirak-ne’e inklui espansaun Aeroportu Internasionál Presidente Nicolau Lobato no planu konstrusaun sentru konvensaun iha Dili, ho kapasidade atu simu ema na’in 17.000.
Ramos-Horta mós refere ba vizita Papa Francisco iha Setembru 2024 nu’udar ezemplu kona-ba kapasidade Timor-Leste nian atu organiza eventu internasionál ho eskala boot.
Nia enfatiza katak, manutensaun ba pás, estabilidade polítika no seguransa nasionál sei kontinua sai prioridade atu garante dezenvolvimentu no konfiansa internasionál.
Iha área diplomásia bilaterál, Prezidente reafirma relasaun forte Timor-Leste nian ho Indonézia, Austrália no Estadus Unidus Amérika.
Depois kompromisu diplomátiku iha Bruxelas, Ramos-Horta sei kontinua viajen ba Fransa atu partisipa iha Paris Peace Forum, ne’ebé promove diálogu no kooperasaun ba pás mundiál.
Durante vizita iha Fransa, Prezidente sei simu kondekorasaun Légion d’honneur hosi Prezidente Emmanuel Macron, nu’udar rekonesimentu hosi Estadu Fransa.
Iha oportunidade hanesan, Ramos-Horta sei fó Kondekorasaun Ordem de Timor-Leste ba Prezidente Fransa, atu selebra amizade no hametin relasaun bilaterál entre nasaun rua.
(eme)
